ءا چ-2018: بەلگيا تۇڭعىش رەت جۇلدەگەرلەر قاتارىنان كورىندى
بۇل قۇرمەتتى اتاق بەلگيا قۇراماسىنا بۇيىردى. بەلگيالىقتار انگليانى 2:0 ەسەبىمەن تىزە بۇكتىردى، دەپ حابارلايدى قازاقپارات ءتىلشىسى.
انگليا مەن بەلگيا قۇرامالارى سانكت-پەتەربۋرگ قالاسىندا قالامەن اتتاس ستاديوندا قولا جۇلدەنى ساراپقا سالدى. جانكۇيەرلەر قوس قۇرامانى دا فينالعا شىعۋعا لايىق ساناعان ەدى. راسىندا، بۇل دوپ دوداسىندا ولار ءتاپ-ءتاۋىر ويىن ورنەگىن كورسەتتى. دەسە دە جارتىلاي فينالدا قارسىلاستارىنا ەسە جىبەرىپ قويدى.
انگليا حورۆاتيادان جەڭىلسە، بەلگيانىڭ فرانسياعا ءتىسى باتقان جوق. بۇل جايىندا «قولا جۇلدە كىمگە بۇيىرادى» دەگەن ساراپتامامىزدا ايتقان ەدىك. كوپ جاعدايدا 3-ورىن ءۇشىن سايىستى جۇبانىش ويىنى دەپ اتايدى. اقتىق سايىسقا شىعا الماي قالعان قۇرامالار دوپ دوداسىنان قۇر قول قايتۋدى قالاماي، وسى ويىنعا بارىن سالىپ جاتادى.
تاريحقا كوز سالىپ قاراساق، ەكى قۇراما دا بۇعان دەيىن قولا جۇلدەگە قول سوزىپ كورگەن جوق ەكەن. انگليا 1966-جىلى التىننان القا تاققانىمەن، بۇدان باسقا الەم بىرىنشىلىگىندە كۇمىس نەمەسە قولا جۇلدەگە قول سوزباعان. بەلگيا قۇرامىندا قاي كەزدە دە ۇزدىكتەر ويىن كورسەتكەنىمەن، قازىرگى كۇنگە دەيىن بىردە-ءبىر مارتە ۇزدىك ۇشتىكتە بولۋ باقىتى ولاردىڭ ماڭدايىنا جازىلماي كەلەدى. تەك 1986-جىلى ءتورتىنشى ورىن العان ەدى. بەلگيا سول ولقىلىقتاردىڭ ورنىن وسى جولى تولتىرىپ قايتقاندى دۇرىس كورگەن سەكىلدى. يراندىق تورەشى اليرەزا فاگانيدىڭ ىسقىرىعى ەستىلىسىمەن بەلگيالىقتار اعىلشىندار قاقپاسىنا لاپ قويدى.
وسىنداي ساتتەردىڭ بىرىندە العاشقى گول دا سوعىلىپ ۇلگەردى. بەلگيا قاقپاشىسى تيبو كۋرتۋا ءوز قاقپاسى اۋماعىنان الاڭنىڭ ورتا شەبىندە جۇرگەن ناسەر شادليگە پاس تاستادى. ول دا اعىلشىندار قاقپاسى ماڭىنداعى توما مەنەگە باعىتتادى. مەنە ونى گولعا اينالدىرىپ، ءوز قۇراماسىن العا شىعارىپ ۇلگەردى. بۇدان كەيىن قوس قۇرامانىڭ دا ەسەپتى وزگەرتۋگە مۇمكىندىگى از بولعان جوق ەدى. دەگەنمەن ءبىرىنشى كەزەڭ 1:0 ەسەبىمەن اياقتالدى. ەكىنشى كەزەڭدە اعىلشىندار تارازى باسىن تەڭەستىرۋگە ۇمتىلدى. قارسىلاستار قاقپاسى ماڭىندا بىرنەشە قاۋىپتى ءساتتى ۇيىمداستىردى. وسىنداي قولايلى ءساتتىڭ ءبىرىن بيىلعى بىرىنشىلىكتىڭ ەڭ ۇزدىك سۇرمەرگەنى گارري كەين ءمۇلت جىبەرىپ الدى. كەيبىر ساتتەردە بەلگيا قۇراماسى ۋاقىتتى ۇستاۋعا نيەتى بار ەكەنىن تانىتىپ قويدى.
اراسىندا شابۋىلعا شىققانىمەن، نەگىزىنەن ءوز قاقپاسى ماڭىندا كوبىرەك ءجۇردى دەسەك تە بولادى. 67-مينۋتتا اعىلشىندار شابۋىل ۇيىمداستىرعان ەدى. ونى شابۋىلشى گارري كەين ءوز پايداسىنا جاراتا العان جوق. 79-مينۋتتا بەلگيا ادەمى ويىن ورنەگىن كورسەتتى. سوڭعى نۇكتەنى توما مەنە قويۋى ءتيىس بولاتىن. دەگەنمەن ونىڭ 20 مەتردەي جەردەن تەپكەن دوبىن انگليا قاقپاشىسى دجوردان پيكفورد قايتاردى. دەگەنمەن ول 82-مينۋتتا وزىمەن بەتپە-بەت شىققان ەدەن ازارعا توسقاۋىل بولا المادى. وسىلايشا بەلگيا ءوز تاريحىندا تۇڭعىش رەت جۇلدەگەرلەر قاتارىنان كورىنىپ وتىر.
بۇعان دەيىنگى ولاردىڭ اتالمىش دوپ دوداسىنداعى ەڭ جوعارى جەتىستىگى - 1986-جىلعى الەم بىرىنشىلىگىندە ءتورتىنشى ورىن الۋى. سونداي-اق، بەلگيا ەۋروپا بىرىنشىلىگىندە 1980-جىلى كۇمىس جۇلدەگەر اتانعان ەدى. ايتا كەتەرلىگى، بەلگيا انگليادان توپتىق كەزەڭدە دە 1:0 ەسەبىمەن باسىم تۇسكەن ەدى. بەلگيا مەن انگليا اراسىندا بۇگىنگە دەيىن 22 كەزدەسۋ وتكەن ەكەن. بەلگيا كوپ جاعدايدا اعىلشىندارعا ەسە جىبەردى. نەبارى 2 كەزدەسۋدە جەڭىسكە جەتكەن. العاشقىسى 1936-جىلى بولعان جولداستىق كەزدەسۋ.
وندا بەلگيا 3:2 ەسەبىمەن مىقتىلىعىن تانىتتى. ودان كەيىنگى جەڭىس بيىلعى توپتىق كەزەڭدە بولدى. ال 15 ويىندا اعىلشىندار جەڭىس تويىن تويلاعان. سونداي-اق، 5 كەزدەسۋ تەڭ اياقتالعان.
الەم بىرىنشىلىگى 15- شىلدەدە مارەسىنە جەتەدى. بۇل كۇنى رەسەي استاناسى - ماسكەۋ تورىندەگى «لۋجنيكي» ستاديونىندا فرانسيا مەن حورۆاتيا قۇرامالارى كەزدەسەدى. اتالمىش كەزدەسۋ «Qazaqstan» جانە «Qazsport» تەلەارنالارىنان تىكەلەي ەفيردە كورسەتىلەدى.
اۆتور: ءادىلجان ۇمبەت
