ءا چ-2018: انگليا قۇراماسى «تاۋىقپەن» جاتتىعۋ جاسادى
كەشە فرانسيانىڭ بەلگيانىڭ قالاي تىزە بۇكتىرگەنىن كوردىك.
ديدە دەشام شاكىرتتەرى ونىڭ الدىندا ارگەنتينا، ۋرۋگۆاي قۇرامالارىن دا تىرپ ەتكىزبەي تاستاپ ەدى. سوڭعى كەزدەرى ءبىرقاتار فۋتبول ماماندارى فرانسيانى توقتاتۋ تەك حورۆاتيانىڭ عانا قولىنان كەلەدى دەگەن سياقتى پىكىرلەر ايتا باستادى. حورۆاتيا فرانسيانى توقتاتۋ ءۇشىن بۇگىن انگليانى جەڭۋى ءتيىس. ال انگليانىڭ بۇل چەمپيوناتتاعى ەسەبى بولەك. ولار، ءتىپتى، جارتىلاي فينالدا حورۆاتيادان سۇرىنبەي وتەتىنىنە كامىل سەنىپ، فينالدا فرانسۋزدارمەن كەزدەسۋگە پسيحولوگيالىق دايىندىقتى باستاپ جىبەرگەن.
كەشە تۋيتتەردە تاراعان ۆيدەوعا قاراعاندا، اعىلشىندار جارتىلاي فينالدى شەتكە ىسىرىپ قويعان سەكىلدى. ماڭىزدى ويىن الدىنان ويىنشىلارعا ەرەكشە كوڭىل كۇي سىيلاۋ ءۇشىن كوماندانىڭ فيزيولوگيالىق دايىندىق جونىندەگى باپكەرلەرى «قۋىرشاق» تاۋىقتى پايدالانۋدى ۇسىنعان. باس باپكەر گارەت ساۋتگەيتتىڭ ايتۋىنشا، نەگىزىنەن جاستاردان قۇرالعان كومانداعا بۇل جاقسى اسەر ەتۋى ءتيىس.
#ENG: нестандартный подход к тренировкам😁🐓👍 pic.twitter.com/g2XDGYkLmj
— Чемпионат мира FIFA 2018🏆🇷🇺 (@fifaworldcup_ru) 10 июля 2018 г.
ايتا كەتەيىك، اتەش - فرانسيا ۇلتتىق قۇراماسىنىڭ سيمۆولى. الگى «قۋىرشاقتى» گارەت ساۋتگەيت ديپلوماتيالىق ادەپ ساقتاپ ادەيى «تاۋىق» دەپ وتىرعانى تۇسىنىكتى. جاتتىعۋ كەزىندە ونى ءبىر- بىرىنە لاقتىرىپ ويىن- ساۋىق قۇرعان اعىلشىننىڭ جاس ويىنشىلارىنىڭ بۇل ارەكەتىن شەتەلدىك ب ا ق «فرانسۋزدارعا ادەيى سەس كورسەتىپ، قىتىعىنا ءتيىپ جاتىر» دەپ باعالاۋدا.
ءبىراق، قانشا جەردەن فاۆوريت سانالعانمەن، اعىلشىندار فينالعا شىعۋ ءۇشىن تاجىريبەسى مول حورۆاتيانىڭ قارسىلىعىن سىندىرۋى ءتيىس. حورۆاتيانىڭ بۇگىنگى ويىنعا شىعارۋى مۇمكىن نەگىزگى قۇرامىندا وڭشەڭ ءتىس قاققان تاجىريبەلى فۋتبولشىلار جينالعان: دانيەل سۋباشيچ؛ شيمە ۆرسالكو، دەيان لوۆرەن، دوماگوي ۆيدا، يۆان سترينيچ؛ يۆان راكيتيچ، مارتسەلو بروزوۆيچ؛ انتە رەبيچ، لۋكا مودريچ، يۆان پەريشيچ؛ ماريو ماندجۋكيچ.
ال انگليا مىناداي قۇراممەن شىعۋى مۇمكىن: دجوردان پيكفورد؛ كايل ۋوكەر، دجون ستوۋنز، حارري ماگۋاير؛ كيران تريپپەر، دەلە اللي، دجوردان حەندەرسون، دجەسسي لينگارد، ەشلي يانگ؛ راحيم ستەرلينگ، حارري كەين.
ويىن استانا ۋاقىتىمەن 00:00-دە بولادى. ونى تىكەلەي ەفيردەن Qazsport جانە Qazaqstan تەلەارنالارى كورسەتەدى.
