ءا چ-2018: برازيليانى جەڭگەن بەلگيا فرانسيادان وتە الا ما؟
قوس ەل كورشىلەس بولعاندىقتان، ەجەلدەن ءبىر-بىرىمەن ميداي ارالاسىپ كەتكەن. فۋتبول مايدانىندا دا فرانسيا مەن بەلگيا ابدەن سىرالعى كوماندالار دەۋگە بولادى. ولار ءبىر-بىرىمەن 77 مارتە كەزدەسىپ، سونىڭ 31 ىندە بەلگيالىقتار، 26 سىندا فرانسۋزدار جەڭىسكە جەتىپ، 20 ويىن تەڭ اياقتالعان. دەگەنمەن دۇنيەجۇزىلىك دودانىڭ شەشۋشى كەزدەسۋى ءۇشىن وتەتىن سوڭعى ايقاستىڭ ءباسى بارىنەن جوعارى ەكەنى حاق.
ۋرۋگۆايلىق اندرەس كۋنيا باستاعان تورەشىلەر قازىلىق ەتەتىن ماتچقا ديدە دەشامنىڭ شاكىرتتەرى جاقسى كوڭىل-كۇيمەن كەلدى. توپتىق باسەكەدە ونشا قينالماي، پلەي-وفقا كۇشىن ۇنەمدەگەن فرانسۋزدار مەسسي باستاعان ارگەنتينانى، سودان كەيىن ۋرۋگۆايدى جولدان تايدىردى. تەك ارگەنتينالىقتاردان ءۇش گول وتكىزىپ العان كوماندا جانكۇيەرلەرىن الاڭداتادى. 1998-جىلى الەم چەمپيونى اتانىپ، 2006-جىلى فينالدا يتاليالىقتارعا ەسە جىبەرىپ، كۇمىس جۇلدەگەر اتانعان فرانسۋزدار سول تابىستارىن قايتالاۋعا ءبىر تابان جاقىن تۇر. ارگەنتينامەن شايقاستا قوس گول سوعىپ، ەسىمىن فۋتبول تاريحىنا جازعان 19 جاسار كيليان مباپپە، سونداي-اق انتۋان گريزمانن، وليۆە جيرۋ سياقتى ويىنشىلارعا بارىن سالاتىن ءسات تۋدى.
روبەرتو مارتينەس جاتتىقتىراتىن بەلگيالىقتار بىرىنشىلىك بارىسىندا فاۆوريتتەردىڭ ءبىرى ەكەندىگىن تانىتا ءبىلدى. ءوز توبىندا بارلىق كەزدەسۋىندە قارسىلاستارىنان باسىمدىق تانىتقان «قىزىل سايتاندار» پلەي-وفف باسەكەسىندە شابۋىلدى تەز ۇيىمداستىراتىن ۇشقىر كوماندا ەكەندىگىن كورسەتتى. جاپونيادان 0:2 ەسەبىمەن ۇتىلىپ جاتىپ، جەڭىستى جۇلىپ العانى - وسىعان دالەل. ال شيرەك فينالدا تۋرنيردىڭ باس فاۆوريتى برازيليادان ايلاسىن اسىرىپ كەتتى. بۇل ماتچتا بەلگيالىقتاردىڭ قارسى شابۋىلداعى كۇشتىلىگى ءوز الدىنا، قورعانىستا دا بارىنشا مىعىم ەكەندىگى كورىندى. بيىلعى بەس ويىنىندا 14 گول سوققان بەلگيا قۇراماسىنداعى ەدەن ازار، كيەۆين دە بريۋينە، رومەلۋ لۋكاكۋ سىندى جاسىنداي جارقىلدايتىن فۋتبولشىلاردىڭ كەز كەلگەن قورعانىستى بۇزىپ وتۋگە شامالارى جەتەدى.
الداعى كەزدەسۋدە فرانسيا ساپىندا پالەندەي وزگەرىس بولا قويماس. ەكى ەسكەرتۋ الىپ، ايىبىن وتەگەن قورعاۋشى بلەز ماتيۋيدي عانا قايتادان الاڭعا شىعادى (ۋرۋگۆايمەن ماتچتا ونى كورەنتەن توليسسو الماستىرعان بولاتىن). الدىن الا مالىمەت بويىنشا فرانسيا قۇراماسى مىناداي بولماق: (4-2-3-1) : لوريس - ەرناندەس، ۋمتيتي، ۆاران، پاۆار - كانتە، پوگبا - ماتيۋيدي، گريزمانن، مباپپە - جيرۋ.
بەلگيا قۇراماسىندا ەسكەرتۋ قاعازىنىڭ كوپتىگىنەن توما مەنە ويناي المايدى، ونى، سىرا، ناسەر شادلي اۋىستىراتىن شىعار: (3-4-3): كۋرتۋا - ۆەرتونگەن، كومپاني، الدەرۆەيرەلد - كارراسكو، فەللايني، ۆيتسەل، شادلي - ازار، لۋكاكۋ، دە بريۋينە.
ايتا كەتەيىك، 11- شىلدە كۇنى ماسكەۋدە حورۆاتيا - انگليا قۇرامالارى الاڭعا شىعادى. ەگەر بەلگيا مەن انگليا ۇتسا، G توبىنان شىققان قوس كوماندا فينالدا قايتا جولىعىسادى.
