ءا چ-2018: شۆەيتساريا تۋرنيردەن ەرتە شىعىپ قالعان گراندتار قاتارىنا قوسىلدى
شۆەيتساريا ويىننىڭ باسىنان اياعىنا شەيىن شابۋىلدادى. ولاردىڭ قۇرام جاعىنان باسىمدىعى دا، 66-مينۋتتا ءوز قاقپاسىنا گول جىبەرىپ العانى دا وسىعان يتەرمەلەدى. ويىن الدىندا شۆەدتەردىڭ مىقتى قورعانىس شەبىن جارىپ كىرۋ وتە قيىن ەكەندىگى ايتىلعان بولاتىن.
«بانكيرلەر» نەگىزىنەن ەكى قاناتتان ۇيىمداستىرىلاتىن شابۋىلدارعا يەك ارتىپ ءجۇردى. ايىپ الاڭىنا ورتادان جارىپ كىرۋدىڭ ءساتى تۇسپەگەن ساتتەردە بىرنەشە رەت تۋرا سوققى باعىتتاپ تا كوردى. ءبىراق ولاردان ناتيجە شىعارۋ جاعى اقساپ جاتتى. ەسەسىنە قولايلى ءساتتى گولعا اينالدىرۋ بويىنشا سكانديناۆ تۇبەگىنىڭ وكىلدەرى ساباق بەرە الاتىنىن كورسەتتى. 66-مينۋتتا ۆ. ليندەلەف دوپتى قورعانىستان شىعارىپ، سول قاناتقا اسىردى. تويۆونەن الاڭ ورتالىعىنداعى فورسبەرگكە پاس بەردى. ە. فورسبەرگتىڭ كۇشتى سوققىسى جولاي شۆەيتساريالىقتاردىڭ قورعاۋشىسى م. اكاندجيدىڭ اياعىنا ءتيىپ، قاقپانىڭ وڭ جاق جوعارى بۇرىشىنا بارىپ كىردى.
شابۋىلعا بەرىلگەن شۆەيتساريالىقتار سوڭعى مينۋتتا پەنالتيدەن تاعى ءبىر گول جىبەرىپ الۋى مۇمكىن ەدى. ءبىراق سلوۆەنيالىق دامير سكومينا ۆيدەوقايتالاۋدى كورگەن سوڭ پەنالتي ەمەس، ايىپ الاڭىنىڭ سىرتىنان ايىپ دوبىن تەبۋ كەرەك ەكەنىن كورسەتتى. بۇدان شۆەدتەر ەشقانداي ناتيجە شىعارا العان جوق. ويىن وسىمەن اياقتالدى.
ەندى شيرەك فينالدا شۆەتسيا انگليا جانە كولۋمبيا ماتچىنىڭ جەڭىمپازىمەن كەزدەسەدى.
اۆتور: نۇرلان تۇياقوۆ
