ءا چ-2018: بۇگىن شۆەتسيا - شۆەيتساريا ويىنى بولادى

جانكۇيەرلەر دەڭگەيلەرى شامالاس ەكى كوماندانىڭ ويىنىنا كۋا بولماق. قۇرام جاعىنان، سىرتتاي قاراعاندا، شۆەيتساريالىقتار باسىمداۋ سياقتى كورىنگەنمەن، ولاردىڭ ويىنىندا تۇراقسىزدىق بايقالىپ ءجۇر. توپتىق كەزەڭنىڭ ءبىرىنشى تۋرىندا «جاياۋ ءجۇرىپ دوپ تەپكەن» برازيليامەن تەڭ ءتۇسىپ، 2-تۋردا سەربيانى ءبىر دوپ ايىرماسىمەن ۇتتى. وسى ويىندا ءتىپتى بەسىنشى مينۋتتا- اق قاقپاسىنان دوپ الىپ شىققان. بۇدان تىس، كوستا- ريكاعا قارسى ويىننىڭ باسىندا دا 20-25 مينۋت بويى ءوز ايىپ الاڭىنان شىعا الماي ءجۇردى. 2:1 ەسەبىمەن جەڭۋى مۇمكىن بولىپ تۇرعاندا، سوڭعى سەكۋندتاردا پەنالتيدەن گول جىبەرىپ الىپ، بەس ۇپايمەن توپتان 2-ورىنمەن شىقتى. ونىڭ ۇستىنە، وتكەن ويىنداردا 2 سارى قاعاز العان كوماندا ليدەرى شتەفان ليحتشتاينەر بۇگىن الاڭعا شىعا المايدى.

ال شۆەتسيا، كەرىسىنشە، سوڭعى كەزدەرى جاقسى قىرىنان كورىنىپ ءجۇر. گەرمانياسى بار توپتان ءبىرىنشى ورىن الۋدىڭ ءوزى نەگە تۇرادى. جالپى، قورعانىسى بيىك شۆەدتەر تەك الەم چەمپيوندارىنان عانا ەكى گول جىبەرىپ الدى. وڭتۇستىك كورەيانى 1:0، مەكسيكانى 3:0 ەسەبىمەن تىزە بۇكتىردى. سكانديناۆ تۇبەگىنىڭ وكىلدەرى چەمپيونات باستالماي جاتىپ- اق فۋتبول قوعامداستىعىن ءبىر شۋلاتىپ ۇلگەردى. ىرىكتەۋ كەزەڭىنەن كەيىنگى وتپەلى ويىندا يتاليانى جەڭىپ، چەمپيوناتتان تىس قالدىرعانى كۇنى بۇگىنگە دەيىن قىزۋ تالقىلاناتىن تاقىرىپتاردىڭ بىرىنە اينالدى.

ءوزارا ويىندار ناتيجەسى بويىنشا دا ەكى كوماندانىڭ دەڭگەيى شامالاس ەكەنىن كورۋگە بولادى. 28 ويىننىڭ 11 ىندە شۆەيتساريا، 10 ىندا شۆەتسيا جەڭىسكە جەتىپ، 7 ويىندا كوماندالار ىمىراعا كەلگەن.

سانكت- پەتەربۋرگتەگى «سانكت- پەتەربۋرگ» ستاديونىندا وتەتىن ويىننىڭ تىكەلەي ترانسلياتسياسىن 20:00-دەن باستاپ  «Qazsport»  جانە «Qazaqstan» تەلەارنالارىنان تاماشالاۋعا بولادى.