ءا چ-2018: وڭتۇستىك كورەيادان جەڭىلگەن گەرمانيا تۋرنيردەن شىعىپ قالدى

استانا. قازاقپارات - فۋتبولدان الەم چەمپيوناتىنىڭ توپتىق كەزەڭى 3-تۋرى اياسىنداعى F توبىنىڭ كەزدەسۋلەرى ءوتتى. گەرمانيا قۇراماسى وڭتۇستىك كورەيادان جەڭىلىپ، جارىس جولىنان شىعىپ قالدى، دەپ حابارلايدى قازاقپارات ءتىلشىسى.

گەرمانيا ۇلتتىق قۇراماسى و باستان وسى كەزدەسۋدىڭ فاۆوريتى دەپ سانالعان بولاتىن. دوپقا يەلىك ەتۋ كورسەتكىشى دە ويىننىڭ باسىنان اياعىنا شەيىن وسىنى دالەلدەپ وتىردى. ءبىرىنشى تايمدا «نەمىس ماشيناسى» قارسىلاستار قاقپاسىنا ايتارلىقتاي قاۋىپ توندىرە المادى. قايتا كورەي فۋتبولشىلارى ارا-تۇرا جىلدام قارىمتا شابۋىلعا شىعىپ، 4 رەت سوققى بەرىپ ۇلگەردى.

ۇزىلىستە باپكەرلەر شتابىنان قاتاڭ تاپسىرمالار الىپ قايتقان گەرمانيا الاڭداعى ۇستەمدىگىن ارتتىرعان ۇستىنە ارتتىرا ءتۇستى. 85-مينۋتتار شاماسىندا دوپقا يەلىك ەتۋ كورسەتكىشى ءتىپتى 80/20 عا دا جەتتى. ءبىراق كەيدە سوققىلار قيىس كەتىپ جاتسا، كەي ساتتەردە وڭتۇستىك كورەيا قاقپاشىسى چو حيۋن ۆۋ تاماشا سەيۆتەر جاساپ، قاقپاسىن گولدان ساقتاپ وتىردى.

«سەن گول سوقپاساڭ، ساعان سوعادى» دەگەن فۋتبولدىڭ تانىمال ماقالى وسى جەردە تاعى ءبىر رەت ەسكە ءتۇستى. نەگىزگى ۋاقىتقا قوسىلعان مينۋتتاردا بۇرىشتامادان كەيىن كورەي فۋتبولشىسى ەڭ گۆون كيم گول سوعىپ، ەسەپ اشتى. قارىمتا شابۋىلداردىڭ تاعى بىرىندە سون حىن مين ەكىنشى دوپتى كىرگىزىپ، كومانداسىنا جۇبانىش ءۇش ۇپايدى سىيعا تارتتى. گەرمانيالىقتار قانشاما شابۋىلداسا دا گول سوعا الماي، چەمپيوناتتى تارىك ەتتى.

ماتچ رەسەيدىڭ قازان قالاسىندا «قازان ارەنا» ستاديونىندا ءوتتى.

اۆتور: نۇرلان تۇياقوۆ