ءا چ-2018: گەرمانيا قۇراماسىنا سىن ساعاتى تۋىپ تۇر
ە توبىندا وڭتۇستىك كورەيا جانە گەرمانيا قۇرامالارى كەزدەسەدى، دەپ حابارلايدى قازاقپارات ءتىلشىسى.
الەمنىڭ ۇزدىك قۇراماسىنىڭ ءبىرى - گەرمانيا دوپ دوداسىن ءساتسىز باستاعانى بەلگىلى. العاشقى تۋردا مەكسيكادان 0:1 ەسەبىمەن جەڭىلىپ، دۇنيە جۇزىندەگى جانكۇيەر قاۋىمنىڭ تاڭدانىسىن تۋعىزدى. ودان كەيىن شۆەتسيانى ارەڭ جەڭدى. جەڭىس گولى سوڭعى مينۋتتا سوعىلدى. بۇل گەرمانيا قۇراماسىنىڭ شىن الەۋەتى مە؟ بۇگىنگە دەيىن ولاردىڭ مۇنداي سۇرەڭسىز ويىنىن كورگەن جوق ەدىك. ولار جارىستى جالعاستىرا الا ما؟ ول دا ءالى بەلگىسىز.
سوڭعى تۋردا شۆەتسيا مەكسيكانى جەڭسە، گەرمانيا وڭتۇستىك كورەيامەن تەڭ ويناپ نەمەسە جەڭىلسە نەمىستەر ەرتەرەك ەلىنە قايتاتىن قۇرامالار قاتارىن تولىقتىرادى. بۇگىنگە دەيىنگى الەم بىرىنشىلىگى بارىسىندا ولاردىڭ تاراپىنان مۇنداي جاعداي تىركەلە قويعان جوق سەكىلدى.
وڭتۇستىك كورەيا العاشقى ەكى تۋردا ەشقانداي ۇپاي العان جوق. شۆەتسيادان 0:1، مەكسيكادان 1:2 ەسەبىمەن جەڭىلدى. دەگەنمەن ولار ءالى دە جارىستى جالعاستىرۋدان ءۇمىت ۇزگەن جوق. سوڭعى تۋردا گەرمانيانى جەڭسە، شۆەتسيا مەكسيكامەن ويىندا جەڭىلسە، توپتاعى ەكىنشى ورىنعا قول جەتكىزۋى ابدەن مۇمكىن.
ءوز جانكۇيەرلەرىن سوڭعى تۋردا قۋانتۋعا تىرىسا ما؟ ونى ويىن بارىسىندا انىقتايتىن بولامىز. وڭتۇستىك كورەيانىڭ شابۋىلشىسى سون حىن مين گەرمانيامەن كەزدەسۋدە جەڭىسكە جەتۋ وڭاي تۇسپەيتىنىن ايتادى. دەگەنمەن ولاردىڭ اتاعىنان ۇرىكپەي، جاسىل الاڭ تورىندە تارتىستى باسەكە بولارىنا ءۇمىت ارتاتىنىن جەتكىزدى. سونداي-اق، ونىڭ بۇل پىكىرىن وڭتۇستىك كورەيانىڭ باس باپكەرى سين تحە ەن دە قۋاتتاي ءتۇستى. «راس، گەرمانيا - بىزدەن مىقتى قۇراما. ونى مويىندايمىز. دەگەنمەن دوپ دومالاق ەمەس پە؟ جانكۇيەردى قۋانتۋعا تىرىسامىز»، - دەدى ول.
كورەيلەر بۇعان دەيىن گەرمانيانى ءبىر مارتە تىزە بۇكتىرگەن. بۇل - 2004 -جىلدىڭ 19 -جەلتوقسانىندا بولعان وقيعا. سول كۇنى قوس قۇراما جولداستىق كەزدەسۋ وتكىزدى. وڭتۇستىك كورەيانىڭ پۋسان قالاسىندا بولعان كەزدەسۋدە الاڭ يەلەرى 3:1 ەسەبىمەن باسىم تۇسكەن ەدى. ال قالعان ەكى ويىن الەم بىرىنشىلىگىنىڭ فينالدىق كەزەڭىندە وتكىزىلدى. وسىدان تۋپ- تۋرا 24 -جىل بۇرىن، دالىرەك ايتقاندا، 1994 -جىلدىڭ 27 -ماۋسىمىندا ا ق ش- تىڭ داللاس قالاسىندا الەم بىرىنشىلىگىنىڭ توپتىق كەزەڭىندە قوس قۇراما كەزدەستى.
وندا گەرمانيا 3:2 ەسەبىمەن جەڭدى. ودان كەيىن قوس قۇراما 2002 -جىلى 25 -ماۋسىمدا كەزدەستى. بۇل - الەم بىرىنشىلىگى فينالدىق كەزەڭىندەگى جارتىلاي فينال ويىنى ەدى. سول جىلى ءوز ەلىندە وتكەن دودادا الەم جۇرتشىلىعىن تاڭعالدىرىپ، جارتىلاي فينالعا دەيىن جەتكەن ەدى. اتالمىش كەزدەسۋدە نەمىستەر 1:0 ەسەبىمەن جەڭدى.
بۇل ويىن رەسەيدىڭ قازان قالاسىندا بولادى. وعان ا ق ش تورەشىسى مارك گەيگەر قازىلىق وتەدى. ويىن 20.00-دە باستالادى. كەزدەسۋ «Qazaqstan» تەلەارناسىنان كورسەتىلەدى. وسى توپتا ەكاتەرينبۋرگ قالاسىندا مەكسيكا مەن شۆەتسيا («Qazsport» .20.00) قۇرامالارى كەزدەسەدى. سونداي-اق، E توبىندا سەربيا مەن برازيليا («Qazaqstan». 00.00)، شۆەيتساريا مەن كوستا-ريكا («Qazsport» .00.00) قۇرامالارى كەزدەسەدى.
