ديماش قۇدايبەرگەن: 2018 -جىلى مەنىڭ تاراپىمنان كوپ جاڭالىق بولادى

None
None
استانا. قازاقپارات - قازاق ءانشىسى ديماش قۇدايبەرگەن قىتايلىق تەلەارناعا سۇحبات بەرىپ، الداعى جوسپارلارى تۋرالى جاريا ەتتى، دەپ حابارلايدى قازاقپارات.

ايتا كەتەيىك، وسى اپتادا د. قۇدايبەرگەن كوكتەم مەرەكەسى - قىتاي كۇنتىزبەسى بويىنشا جاڭا جىل مەرەكەسىنە وراي «CCTV» تەلەارناسىنىڭ ۇيىمداستىرۋىمەن وتكەن ۇلكەن كونسەرتكە قاتىستى.

«العاش رەت «CCTV» ۇيىمداستىرۋىمەن ءوتىپ جاتقان جاڭا جىل مەرەكەسىنە قاتىسۋدامىن. وسى ايتۋلى مەرەكەلىك شارادا ونەر كورسەتىپ جاتقانىم ءۇشىن وتە قۋانىشتىمىن. وسى كونسەرتتەگى انگە دايىندالۋعا ءبىراز ۋاقىت كەتتى. بۇل تەك قانا جەكە ورىنداۋداعى ءان ەمەس. قاسىمداعى باۋىرلارىممەن، دوستارىممەن ونەر كورسەتپەك ويىمىز بار. ءبىراز ەڭبەكتى تالاپ ەتەتىن ءنومىر بولدى. ەڭ ۇلكەن قيىنشىلىق - ول قىتاي تىلىندە ءان سالۋ. قىتاي ءتىلى وتە باي دەپ ايتسام بولادى، 5 مىڭنان استام يەروگليفتەرى بار. سول سەبەپتەن ءاندى ءدال ناقىشىنا كەلتىرىپ، ۇيرەنىپ العاننان كەيىن ساحنادا ورىنداۋعا تىرىستىم»، - دەدى قازاق ءانشىسى.

بۇدان بولەك ديماش الداعى جوسپارلارى تۋرالى ايتىپ بەردى.

«جاڭالىقتارىمىز وتە كوپ، قازىرگى تاڭدا مەنىڭ جەكە شىعارماشىلىق كەشتەرىم ءوتىپ جاتىر. العاشقى كەشىم استانادا ۇيىمداستىرىلدى، سودان كەيىن قىتاي ەلىنىڭ ىشىندە وتۋدە. ودان كەيىن وزگە دە شەت مەملەكەتتەردە كونسەرت بەرەمىز. بارلىقتارىڭىزدى جەكە شىعارماشىلىق كەشتەرىمدە كۇتەتىن بولامىن. وسى ورايدا كوڭىلدەرىڭىزدەن شىعۋ ءۇشىن بارىمدى سالىپ، تىرىساتىن بولامىن. اتاپ ايتقاندا، جاڭا بەينە بايانداردى ءتۇسىرۋ ويىمدا بار. ارينە، كورەرمەندەرىم ونى كۇتىپ قالعانىن بىلەمىن. البومدى دا ءتامامداپ قالدىق. جالپى، 2018 -جىلى مەنىڭ تاراپىمنان كوپ جاڭالىق بولادى دەگەن ويدامىن»، - دەپ اتاپ ءوتتى ديماش قۇدايبەرگەن.

اۆتور: رۋسلان عابباسوۆ

سوڭعى جاڭالىقتار