قانسونار-2018: قازاقستانداعى ەڭ العىر قىران انىقتالدى - فوتو
قىران قۇستاردىڭ باعى مەن بابى سىنعا تۇسكەن جارىسقا ەلىمىزدىڭ 10 وبلىسىنان 39 بۇركىتشى قاتىستى. جارتىلاي فينالعا 13 بۇركىتشى شىعىپ، فينالدا تورتەۋى ءوزارا باق سىناستى.
چەمپيوناتتىڭ ەرەجەلەرىنە سايكەس قۇسبەگىلەرگە بىرنەشە تالاپتار قويىلدى. الدىمەن سايىسقا قاتىسۋشىلاردىڭ كيگەن كيىمى، قۇرال-جابدىقتارى مەن قۇستارىنىڭ بابى سىنالىپ، تورەشىلەر تاراپىنان سايكەس ۇپايلارىن الدى.
بۇگىن قاتىسۋشىلار قويان، تۇلكى اۋلاۋ بويىنشا سىنعا ءتۇستى. جارىستىڭ كورىگى قويانعا قۇس سالعاندا قىزا ءتۇستى. ءتورت قىران دا بۇل سىننان سۇرىنبەي ءوتتى. وسىدان سوڭ تورەشىلەردىڭ شەشىمىمەن «قولعا شاقىرۋدان» قايتا سايىس ۇيىمداستىرىلىپ، جەڭىمپازدار انىقتالدى.
سايىس قورىتىندىسىندا بۇركىتشىلەردىڭ ۇزدىك تورتتىگى انىقتالىپ، بارشاسى دا قوماقتى قارجىلاي سىيلىقتارعا يە بولدى.
وڭتۇستىك قازاقستاننان كەلگەن نۇرعالي اليقۇلوۆتىڭ بۇركىتى ءبىرىنشى ورىنعا يە بولىپ، 250 مىڭ تەڭگەنىڭ سەرتيفيكاتى بەرىلدى. شىعىس قازاقستان وبلىسى ءۇرجار اۋدانىنىڭ قۇسبەگىسى نۇعىم قايدار ەكىنشى ورىن يەگەرى اتانىپ، 150 مىڭ تەڭگە وجالادى. الماتى وبلىسىنان ەلتاي مۋفتەكەيەۆ قولا جۇلدەنى قانجىعاسىنا بايلاپ، 100 مىڭ تەڭگەنى ۇتىپ الدى.
ءتورتىنشى ورىنعا شىعىس قازاقستاندىق تاتتىمبەت كاپ ۇلى تابان تىرەدى.
جارىستىڭ سوڭىندا ءسوز العان ءۇرجار اۋدانىنىڭ اكىمى سەرىك زاينۋلدين بۇركىتشىلەر باسقوسۋىنىڭ ەلوردامىز استانا قالاسىنىڭ 20 جىلدىق مەرەيتويىنا ارنالعانىن اتاپ ءوتتى. سونداي-اق، ەلباسى نۇرسۇلتان نازاربايەۆتىڭ جانە «نۇر وتان» پارتياسىنىڭ قولداۋىمەن ەلىمىزدە ۇلتتىق سپورت تۇرلەرى كەڭىنەن دامىپ كەلە جاتقاندىعىن ايتتى.
«شىعىستىڭ شىرايلى جەرىندە ءۇرجار اۋدانىندا قۇسبەگىلەردىڭ چەمپيوناتى وتە جوعارعى دەڭگەيدە ءوتتى. ءۇرجار اۋدانى باسشىلىعىنا، دەمەۋشىلىك كورسەتكەن ازاماتتارعا العىسىمىز زور. قىرىققا جۋىق قۇسبەگى باق سىناستى. ەلىمىزدە بۇركىتشىلەر سانى جىل سايىن كوبەيىپ كەلەدى. بۇل دەگەنىمىز ەلىمىزدە اتادان مۇرا بولعان قۇسبەگىلىك ونەردىڭ كەڭ قانات جايعانىنا ايقىن دالەل»، - دەدى ق ر سپورت جانە دەنەشىنىقتىرۋ ىستەرى كوميتەتىنە قاراستى ۇلتتىق سپورت باسقارماسىنىڭ ساياتشىلىقتان باس جاتتىقتىرۋشىسى بازاربەك كۇنتۋعان ۇلى.
