وليمپيادا-2018: سپورتشىلاردى تىركەۋ اياقتالدى

استانا. قازاقپارات - بۇگىن حالىقارالىق وليمپيادا كوميتەتى وڭتۇستىك كورەيادا وتەتىن XXIII قىسقى وليمپياداعا قاتىساتىن سپورتشىلاردى تىركەۋدى اياقتادى، دەپ حابارلايدى قازاقپارات ءتىلشىسى.

پحەنچحان وليمپياداسىن ۇيىمداستىرۋ كوميتەتى تاراتقان مالىمەتتەرىنە سۇيەنسەك، بارلىق سپورت تۇرلەرىنەن سپورتشىلاردى تىركەۋ اياقتالعان. ەندى، بۇگىننەن باستاپ پحەنچحان وليمپياداشىلاردى قابىلداي باستايدى.

جالپى قىسقى ويىندارىنا 92 ۇلتتىق وليمپيادا كوميتەتتەن 2295 سپورتشى تىركەۋدەن وتكەن.

وڭتۇستىك كورەيانىڭ وزىنەن 15 سپورت ءتۇرى بويىنشا 144 سپورتشى مەدالعا تالاسادى. ال سولتۇستىك كورەيادان ءتورتجىلدىق دوداعا 5 سپورت تۇرىنەن 22 سپورتشى قاتىساتىنى بەلگىلى بولدى.

سونىمەن قاتار پحەنچحان وليمپياداسىنا 6 مەملەكەت تۇڭعىش رەت قاتىسقالى وتىر. ولار - ەكۆادور (شاڭعىمەن سىرعاناۋ)، ەريترەيا (ءالپى شاڭعىمەن سىرعاناۋ)، كوسوۆو (ءالپى شاڭعىمەن سىرعاناۋ)، مالايزيا (فيگۋرالىق كونكي)، نيگەريا (بوبسلەي جانە سكەلەتون) جانە سينگاپۋر (Short Track Skating) سپورتشىلارى.

اۆتور: كۇنسۇلتان وتارباي