بوكستان قازاقستان قۇراماسى 2018-جىلعى جاتتىعۋ جۇمىستارىنا كىرىستى
بۇل تۋرالى قازاقپارات تىلشىسىنە قۇرامانىڭ باس باپكەرى مىرزاعالي ايتجانوۆ ايتىپ بەردى.
«ازداعان دەمالىستان كەيىنگى العاشقى جاتتىعۋعا كىرىسىپ كەتتىك. ەندى بوكسشىلار وسى جىلدىڭ سوڭىنا دەيىن تىنىم تاپپاي ەڭبەكتەنەتىن بولادى. الدا ازيادا ويىندارى. سول ءۇشىن بارىمىزدى سالىپ، ەڭبەكتەنەتىن بولامىز. قازىر جاتتىعۋعا ءتورت قۇرام تولىعىمەن كىرىستى»، - دەپ اتاپ ءوتتى باپكەر.
بوكسشىلار الماتىداعى ا ي ب ا اكادەمياسىندا جاتتىعىپ جاتىر.
سونداي-اق، باس باپكەر الداعى جوسپارلارىمەن دە قىسقاشا بولىسە كەتتى.
«ازياداعا دەيىن كوپتەگەن جارىستارعا، وقۋ-جاتتىعۋلارعا قاتىسامىز. اقپان ايىندا رەسەي، وزبەكستان قۇرامالارىمەن بىرلەسكەن وقۋ-جاتتىعۋلارىن جاساساق، ناۋرىزدا رەسەيگە بارامىز. ساۋىردە تاعى ءبىر شەتەلگە وقۋ-جاتتىعۋعا بارۋدى جوسپارلاپ وتىرمىز. مامىر ايىندا ءوز ەلىمىزدە شەت ەلدەن قۇرامالار شاقىرىپ جاتتىعۋ جاسايتىن بولامىز. اراسىندا كوپتەگەن حالىقارالىق دودالار بولادى. سول جارىستارعا ءتورت قۇرامدى دا قاتىستىرىپ، ىشىنەن كىل مىقتىلاردى تالداپ، ازيا ويىندارىنا اپارۋدى جوسپارلاپ وتىرعان جايىمىز بار»، - دەدى ايتجانوۆ.
اۆتور: كۇنسۇلتان وتارباي
