وليمپيادا-2018: ماقساتىمىز - وليمپيادادا مەدال الۋ، ءمادىعالي قارسىبەكوۆ
اق وليمپيادانى سپورتشىلارىمىز دا تاعاتسىزدانا كۇتىپ جۇرگەنى بارشامىزعا بەلگىلى. وسىعان وراي شورت-ترەكتەن قازاقستان قۇراماسىنىڭ باس باپكەرى ءمادىعالي قارسىبەكوۆكە ارنايى حابارلاسىپ، ول جاتتىقتىراتىن شاكىرتتەرىنىڭ دايىندىعى تۋرالى تولىعىراق اقپارات الۋدىڭ ءساتى ءتۇستى، دەپ حابارلايدى قازاقپارات ءتىلشىسى.
- ءمادىعالي ءابدىعالي ۇلى، قىسقى وليمپيادانىڭ باستالۋىنا ساناۋلى كۇندەر عانا قالدى. قازىر قايدا دايىندالىپ جاتسىزدار؟
- شورت- ترەكتەن ەرلەر قۇراماسى مامىر ايىنان باستاپ، گوللانديانىڭ حەرەنۆەن قالاسىندا جەرگىلىكتى سپورتشىلارمەن بىرگە جاتتىعۋدا. ال ايەلدەر قۇراماسى وليمپيادا وتەتىن وڭتۇستىك كورەيادا دايىندالىپ جاتىر. جىگىتتەردىڭ دايىندىعىن ءوزىم باقىلاۋىما الدىم. ال قىزداردى كورەيالىق مامان يۋن سەۋنگ ناممەن بىرگە قازاقستاندىق باپكەر اسلان داۋموۆ جاتتىقتىرۋدا. وسىدان بىرەر كۇن بۇرىن ولاردىڭ دايىندىعىن دا ارنايى بارىپ كوزبەن كورىپ شىقتىم.
- جالپى دايىندىقتارىڭىز قالاي؟
- دايىندىعىمىز جامان ەمەس. قولدان كەلگەن بار مۇمكىندىكتەردى جاساپ جاتىرمىز. ماقساتىمىز - وليمپيادادا مەدال الۋ. سوچي وليمپياداسىندا شاكىرتتەرىم مىڭ مەترلىك ەستافەتالىق باسەكەدە بەسىنشى ورىنعا تابان تىرەگەن بولاتىن. بۇل جولى ودان ەكى-ءۇش ەسە جوعارى كورسەتكىشكە قول جەتكىزۋگە بار كۇشىمىزدى سالامىز.
- ءوز جوسپارلارىڭىز بويىنشا قانشا مەدالدى كوزدەپ وتىرسىزدار؟
- بۇل - جاي جارىس ەمەس. سوندىقتان، «ارىق ايتىپ، سەمىز شىعۋعا» تىرىسامىز.
- قازىر كونكي سپورتى بويىنشا جولدامالار سانى ناقتى بەلگىلى بولدى. ال سىزدەر وليمپيادادا ەل نامىسىن كىمدەر قورعايتىنىن شەشىپ قويعان بولارسىزدار؟
- ارينە، پحەنچحان قالاسىندا كىمدەر سىنعا تۇسەتىنىن وسىعان دەيىن انىقتاپ الدىق. سول سپورتشىلارمەن جۇمىس ىستەپ جاتىرمىز. تۇڭعىش رەت وليمپياداعا 10 جولداما الىپ وتىرمىز. بۇل - وتە جاقسى كورسەتكىش.
- شاكىرتتەرىڭىز اراسىندا كىمدەرگە باستى ءۇمىت ارتىپ وتىرسىز؟
- بۇل - سپورت! كەيدە مۇلدە ءسىز جانە مەن ويلاماعان جاعدايلار ورىن الۋى مۇمكىن. سوندىقتان، ەشكىمدى الالاپ، بولە جارمايمىن. ءبارىنىڭ باعى بىلەدى. ءبىراق، وسىعان دەيىنگى دودالاردا وزدەرىڭىز كورىپ جۇرگەندەي 500 مەتر قاشىقتىقتا ابزال اجىعاليەۆ، دەنيس نيكيشا جانە نۇربەرگەن جۇماعازيەۆتەر جاقسى قىرىنان تانىلىپ ءجۇر. سونداي-اق، جۇماعازيەۆ 1000 جانە 1500 مەتردە دە جارىس جولىنا شىعادى. ال قىزدار اراسىندا اناستاسيا كرەستوۆا 500، 1000 جانە 1500 مەترلىك قاشىقتىقتا ءوزىنىڭ مىقتىلىعىن دالەلدەپ كەلەدى.
- جۇماعازيەۆتىڭ ازداپ جاراقات الىپ قالعانىن ەستىپ ەدىك. قازىر تولىقتاي ساۋىقتى ما؟
- قازىر جاقسى. جاراقاتىنان ايىعىپ، جاتتىعۋعا بەل شەشە كىرىسىپ كەتتى.
- وسى ورايدا سۇراي كەتسەك، جاقىندا ءبىر كورەيالىق قىز وسى وليمپيادادا قازاق ەلىنىڭ اتىنان سىنعا تۇسەدى دەگەن اڭگىمەلەر ايتىلىپ ەدى...
- ءيا، ول قازىر ءبىزدىڭ قۇرامادا جاتتىعىپ جاتىر. ەسىمى - كيم يونگ ا. ول وليمپيادادا 1000 جانە 1500 مەتردەن ەل نامىسىن قورعايتىن بولادى.
- وسى ءتورتجىلدىق دودادا ءبىزدىڭ باستى قارسىلاستارىمىز قاي ەل بولماق؟
- ەڭ باستى قارسىلاستارىمىز وليمپيادا قوجايىنى كورەيالىقتار بولاتىنى انىق. ال ودان كەيىنگى مىقتىلاردى وزدەرىڭىز بىلەسىزدەر، ولار - گوللانديا، كانادا، قىتاي جانە ا ق ش سپورتشىلارى. وسى اتالعان ەلدەردىڭ سپورتشىلارىمەن تەرەزەمىز تەڭەسىپ، ەل قورجىنىنا مەدال سالساق دەگەن ارمانىمىز بار. اللا ءساتىن سالسا، ول كۇندەر دە الىس ەمەس. سوندىقتان، بىزگە كۇدىكپەن ەمەس، ۇمىتپەن قاراڭىزدار...
- اڭگىمەڭىزگە راحمەت!
اۆتور: كۇنسۇلتان وتارباي
