قازاقستاندا 2018-جىلدان باستاپ جەدەل جاردەم كولىگىنىڭ ءتۇسى وزگەرەدى
استانا. قازاقپارات - 2018 -جىلدان باستاپ ەلىمىزدەگى بارلىق جەدەل جاردەم كولىكتەرى اقشىل كۇلگىن تۇستەن سارى تۇسكە بويالادى، دەپ حابارلايدى Elorda Aqparat.
سونداي-اق، كولىكتەر جارىق تۇسىرەتىن ەلەمەنتتەرمەن ەرەكشەلەنەتىن بولادى.
بۇل قادام حالىقارالىق تاجىريبەگە سۇيەنە وتىرىپ جاسالدى. دامىعان مەملەكەتتەردەگى شۇعىل قىزمەت كولىگىن قانىق تۇستەرگە، ونىڭ ىشىندە ليمون تۇسىنە بوياۋ ءجيى كەزدەسەدى.
ساراپتاماعا سايكەس، قانىق تۇسكە بويالعان جەدەل جاردەم كولىگى باسقا كولىكتەرگە قاراعاندا بىردەن كوزگە تۇسەدى. بۇل دارىگەرلەردىڭ جەدەل ءارى قاۋىپسىز قىزمەت كورسەتۋىنە كومەكتەسەدى دەپ سەنەدى مينيسترلىكتەگىلەر. مەديتسينالىق قىزمەتتى جاقسارتۋ مەن ونىڭ الەۋەتىن ارتتىرۋ تەك سانيتارلىق اۆتوكولىكتىڭ جاڭا ديزاينىمەن شەكتەلمەيدى. مينيسترلىك مەديتسينالىق قىزمەتكەرلەردى زامانعا ساي جابدىقتارمەن جانە جاڭا فورمامەن قامتاماسىز ەتەدى. سونىمەن قاتار، نورماتيۆتىك-قۇقىقتىق بازانى رەتتەپ، دارىگەرلەر مەن جۇرگىزۋشىلەردى وقىتۋدىڭ جاڭا جۇيەسىن ەنگىزۋ ارقىلى مەديتسينالىق قىزمەت كورسەتۋ ساپاسىن ارتتىرۋدى كوزدەيدى.
«بۇگىن قازاقستان مەديتسيناسىنداعى تاريحي كۇن دەۋگە بولادى. وسى جوبانىڭ جۇزەگە اسىرىلۋىن ءبىز كوپ كۇتتىك. حالىقتىڭ باسىم كوپشىلىگى كولىكتەردى باسقا تۇسكە بوياۋ بەكەر شىعىن دەپ ويلاۋى مۇمكىن. الايدا مۇنى ىستەۋىمىزدىڭ ءبىرقاتار سەبەپتەرى بار. قازاقستاندا، ونىڭ ىشىندە استانادا كولىك اعىنىندا اق ءتۇستى كولىكتەردى ءجيى بايقايمىز. ەندىگارى سارى تۇسپەن ەرەكشەلەنگەن ماشينانى جەدەل جاردەم ەكەندىگىن اڭعارۋ كۇندىزگى ۋاقىتتا دا، تۇنگى ۋاقىتتا دا قيىنعا سوقپايتىن بولادى. مينيسترلىك سولتۇستىك امەريكا مەن ەۋروپا ەلدەرىنىڭ تاجىريبەسىن زەرتتەي كەلە، قازاقستانعا وزىندىك ديزايندى ويلاپ تاپتى، - دەيدى جەدەل جاردەم قىزمەتىن مودەرنيزاتسيالاۋ كوميسسياسىنىڭ ءتوراعاسى كەۆين فريك.
ايتا كەتەيىك، جاڭا جىلدان باستاپ بۇكىل رەسپۋبليكا بويىنشا 1894 جەدەل جاردەم كولىگى سارى تۇسكە بويالادى.
