قازاقستاندا 2018 - جىلدان باستاپ عارىش اپپاراتتارى ءوندىرىسى تولىققاندى ىسكە قوسىلادى - م. مولدابەكوۆ
بۇل تۋرالى بۇگىن الماتىدا «يونوسفەرا ينستيتۋتى» ەنشىلەس جاۋاپكەرشىلىگى شەكتەۋلى سەرىكتەستىگىندە ءوتىپ جاتقان حالىقارالىق «الدىڭعى قاتارلى عارىشتىق زەرتتەۋلەر مەن تەحنولوگيالار» عىلىمي- تاجىريبەلىك سەمينار- وتىرىسى بارىسىندا ق ر ينۆەستيتسيالار جانە دامۋ مينيسترلىگى ايروعارىش كوميتەتى ءتوراعاسىنىڭ ورىنباسارى مەيىربەك مولدابەكوۆ ءمالىم ەتتى.
ونىڭ ايتۋىنشا، وسى ماقساتتا استانا قالاسىنىڭ ماڭىندا قازاقستاننىڭ جاڭا ۇلتتىق عارىشتىق زەرتتەۋلەر جانە تەحنولوگيالار ورتالىعى قۇرىلاتىن بولادى.
«قازىر بۇل جەردە عارىشتىق تەحنيكالار مەن اپپاراتتاردى قۇراستىرۋشى- سىناق كەشەنى سالىنىپ جاتىر. بۇل ت م د اۋماعىندا تەڭدەسى جوق كەشەن بولماق. جالپى، ورتالىقتىڭ قۇرامىندا ارنايى كونسترۋكتورلىق- تەحنولوگيالىق بيۋرو، تاجىريبەلىك ءوندىرىس جانە قۇراستىرۋشى- سىناق كەشەنى بولادى. بولاشاقتا عارىشتىق جوبالار وسى بيۋرودا ازىرلەنىپ، تاجىريبەلىك وندىرىستە قۇراستىرىلىپ، قۇراستىرۋشى- سىناق كەشەنىندە سىناقتان وتكىزىلەدى. بيۋرو مۇشەلەرىنىڭ قۇرامىن قازىر تۇگەندەپ جاتىرمىز. ونىڭ قۇرامىنا نەگىزىنەن رەسەي، ۋكراينا جانە باسقا دا شەت ەلدەردە ءبىلىم الىپ، فرانسيا مەن انگليادا تاعلىمدامالاردان ءوتىپ كەلگەن وتاندىق جاس دارىندى ماماندار ەنەتىن بولادى»، - دەدى ءوز سوزىندە م. مولدابەكوۆ.
ول سونىمەن قاتار ازىرگە ورتالىقتان قۇراستىرىلىپ شىعارىلاتىن عارىشتىق تەحنيكالار مەن اپپاراتتاردىڭ قۇرامداس بولىكتەرىنىڭ 55 پايىزى قازاقستاندا جاسالاتىندىعىن جەتكىزدى.
«ازىرگە جاساندى جەر سەرىكتەرىنىڭ قۇرامداس بولىكتەرىن تولىعىمەن قازاقستاندا جاساۋ مۇمكىن ەمەس. تەك 55 پايىزى وندىرىلەدى. مۇنىڭ ءوزى ۇلكەن جەتىستىك. بۇل ءۇشىن فرانسيالىق ارىپتەستەرىمىزدەن عارىشتىق اپپاراتتاردىڭ قۇرامداس بولىكتەرىن وندىرۋگە ارنالعان تەحنولوگيالاردى الامىز. ءسويتىپ، ورتالىقتا وسى باعىتتا قازاقستاندىق- فرانسۋزدىق بىرلەسكەن كاسىپورىندار جۇمىس ىستەيتىن بولادى. كەشەن 2017 - جىلدىڭ سوڭىنا قاراي پايدالانۋعا بەرىلىپ، 2018 - جىلدان باستاپ عىلىمي ازىرلەمەلەردەن باستاپ، دايىن ءونىم شىعارۋعا دەيىنگى بۇكىل تەحنولوگيالىق جەلى ىسكە قوسىلادى»، - دەدى م. مولدابەكوۆ.
ايتا كەتەلىك، اتالمىش ورتالىق ەلباسىنىڭ تاپسىرۋىمەن استانا قالاسىنىڭ ماڭىندا حالىقارالىق اۋەجايعا بارا جاتقان جولدا 30 گەكتار جەردە بوي كوتەرەدى.
اۆتور: جاپپاربەرگەن ايبوتا
