قازاقستان 2018-جىلى كومىرسۋتەك شيكىزاتىنىڭ قورلارى بويىنشا حالىقارالىق ەسەپتىلىك ستاندارتىنا كوشەدى - ۇ. قارابالين
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگ بارىسىندا ەنەرگەتيكا ءبىرىنشى ۆيتسە-ءمينيسترى ۇزاقباي قارابالين ءمالىم ەتتى. بريفينگ ەلباسى ايقىنداعان «100 قادام» ۇلت جوسپارى اياسىندا جەر قويناۋىن پايدالانۋ سالاسىنداعى ىلگەرى رەفورمالار تاقىرىبىندا وتكەن بولاتىن.
«ەلباسىنىڭ ايقىنداعان بەس رەفورماسى اياسىنداعى «100 قادام» ۇلت جوسپارىنىڭ 74-75- قادامى جەر قويناۋىن پايدالانۋ رەفورمالاۋعا قاتىستى بولىپ تابىلادى. وسىعان بايلانىستى، ەنەرگەتيكا مينيسترلىگى مۇناي جانە گاز سالاسىندا الدىڭعى قاتارلى تاسىلدەردى ەنگىزۋ بويىنشا ناقتى رەفورمالاردى قولعا الاتىن بولادى.
بۇل رەتتە 74 ءى قادام جەر قويناۋىن پايدالانۋ سالاسىندا قاتتى پايدالى قازبالار مەن كومىرسۋتەك شيكىزاتتارى قورلارى بويىنشا حالىقارالىق ەسەپتىلىك ستاندارتى جۇيەلەرىن ەنگىزۋ ارقىلى اشىقتىقتى، بولجامدىلىقتى ارتتىرۋ بولىپ تابىلادى. ال 75-قادام ۇزدىك الىمدىك تاجىريبەلەردى قولدانا وتىرىپ، بارلىق پايدالى قازبالار بويىنشا كەلىسىم-شارتتاردى جاساۋدىڭ وڭايلاتىلعان تاسىلدەرىن ەنگىزۋدى كوزدەيدى»، - دەدى ۇ. قارابالين.
ونىڭ ايتۋىنشا، بۇگىنگى كۇنى قازاقستاندا مينەرالدى-شيكىزاتتىق كەشەن گەولوگيالىق بارلاۋ جۇمىستارىن ارتتىرۋ ارقاسىندا قولداۋ جالعاسىپ كەلەدى. بۇل رەتتە حالىقارالىق كاپيتال نارىعى بۇل جۇمىستاردىڭ نەگىزگى كوزى بولىپ تابىلادى. «2018-جىلى كومىرسۋتەك شيكىزاتىنىڭ قورلارى بويىنشا حالىقارالىق ەسەپتىلىك ستاندارتى جۇيەسىنە كوشۋدى جوسپارلاپ وتىرمىز. بۇل رەتتە ستاندارتتى قولدانۋ بويىنشا قازاقستاندىق ۇلتتىق ۇيىم قۇرىلاتىن بولادى»، - دەدى قارابالين.
اۆتور: قانات مامەتقازى ۇلى
