قازاقستان 2018 - جىلى استانادا بۇكىل الەمدىك تاۋ - كەن كونگرەسىن وتكىزەدى - كارىم ءماسىموۆ
«وسى جىلدار ارالىعىندا كونگرەسس تاۋ- كەن كەشەنىندەگى ماسەلەلەردى شەشۋدە ماڭىزدى حالىقارالىق الاڭ بولىپ كەلەدى. بۇگىنگى وتكىزىلىپ وتىرعان فورۋمنىڭ ماڭىزى زور.
تاۋ- كەن مەتاللۋرگيالىق كەشەنى كوپتەگەن ەلدەردىڭ ەكونوميكالىق- الەۋمەتتىك جانە تەحنولوگيالىق دامۋىن انىقتايتىن ماڭىزدى سالالاردىڭ ءبىرى. سوڭعى وتىز جىلدىڭ ىشىندە الەمدىك پايدالى قازبالاردى ءوندىرۋ كولەمى 1,5 ەسەگە ءوستى. فورۋم شەڭبەرىندە وتكىزىلگەن حالىقارالىق ۇيىمداستىرۋ كوميتەتىنىڭ كەزەكتى وتىرىسى 2018 - جىلى جوسپارلانعان 25- بۇكىل الەمدىك تاۋ- كەن كونگرەسىن ءتيىستى دەڭگەيدە وتۋىنە نەگىز بولادى دەپ ويلايمىن» ، - دەدى ك. ءماسىموۆ.
وسى ورايدا ۇكىمەت باسشىسى قازاقستان بۇكىلالەمدىك تاۋ- كەن كونگرەسىن ءتيىستى دەڭگەيدە وتكىزۋگە قاجەتتى جاعدايدى جاسايتىنىن اتاپ ءوتتى.
«قازاقستاننىڭ تاۋ- كەن مەتاللۋرگيالىق كەشەنى ەل ەكونوميكاسىنىڭ ماڭىزدى ءبىر بولىگى. ونىڭ ونەركاسىپتىك ءوندىرىس كولەمىندەگى ۇلەسى 18 پايىزدى قۇرايدى. وندا 300 مىڭعا جۋىق ادام جۇمىس ىستەيدى. قازاقستان رەسپۋبليكاسى پرەزيدەنتى جانىنداعى تاۋ- كەن مەتاللۋرگيا، گەولوگيا جانە جەر قويناۋىن پايدالانۋ جونىندەگى كەڭەس تابىستى جۇمىس ىستەۋدە. كەڭەستىڭ الدىندا تاۋ- كەن مەتاللۋرگيا، گەولوگيا جانە جەر قويناۋىن پايدالانۋ سالالارىنداعى ستراتەگيالىق باعىتتى انىقتاۋ جانە جۇيە قالىپتاستىراتىن مەكەمەلەرمەن ءوزارا بايلانىس ورناتۋ مىندەتتەرى تۇر. ۇدەمەلى يندۋستريالىق- يننوۆاتسيالىق دامۋ باعدارلاماسىن جۇزەگە اسىرۋدا تاۋ- كەن مەتاللۋرگيا سالاسىندا 50 جاڭا ءوندىرىس ىسكە قوسىلدى. وسى جىلى تاعى 7 جوبانى ىسكە قوسۋ جوسپارلانىپ وتىر» ، - دەدى ك. ءماسىموۆ.
سونىمەن قاتار ۇكىمەت باسشىسى يندۋستريالىق- يننوۆاتسيالىق دامۋدىڭ ەكىنشى بەس جىلدىعىندا باسىم باعىت قارا جانە ءتۇرلى- ءتۇستى مەتاللۋرگيا بولىپ تابىلاتىنىن اتاپ ءوتتى. «ۇكىمەت تاۋ- كەن مەتاللۋرگيا ءوندىرىسىن دامىتۋ بويىنشا 2018 - جىلعا دەيىن كەشەندى جوسپاردى بەكىتتى. ەلىمىزدىڭ تاۋ- كەن مەتاللۋرگيا كەشەنىنە ۇلكەن مىندەتتەر قويىلدى. ءبىز ينۆەستيتسيالىق جاعدايدى جەتىلدىرۋدە جانە دامىتۋدا كۇشىمىزدى سالامىز» ، - دەپ ءتۇيدى ول.
ەستەرىڭىزگە سالا كەتەيىك، 2018 - جىلى بۇكىل الەمدىك تاۋ- كەن كونگرەسى استانادا وتەدى.
اۆتور: رۋسلان عابباسوۆ
