ازيادا-2018: قازاقستاندىق 9 بوكسشى شيرەك فينالعا شىقتى

جاكارتا. قازاقپارات - 27 -تامىز كۇنى قازاقستاندىق ءۇش بوكسشى ازيا ويىندارىنىڭ شيرەك فينالىنا شىقتى، دەپ حابارلايدى قازاقپارات ءتىلشىسى قازاقستان بوكس فەدەراتسياسىنا سىلتەمە جاساپ.

2017 -جىلعى الەم چەمپيونى قايرات ەراليەۆ (56 كەلى) قارسىلاسى تايلىق سپورتشى، 2015 -جىلعى ازيا چەمپيونى چاتچاي بۋتديمەن جۇدىرىقتاسۋ كەزىندە وسالدىق تانىتتى. بۇل - كوماندانىڭ العاشقى جەڭىلىسى. تايلىق بوكسشى تورەشىلەردىڭ ءبىراۋىزدان شەشىمىمەن جەڭىمپاز اتانىپ، ەراليەۆ فينالدىڭ 1/8 كەزەڭىندەگى العاشقى جەكپە-جەگىنەن كەيىن ازيادا ويىندارىنان شەتتەتىلۋگە ءماجبۇر بولدى.

ازياداداعى قازاقستان قۇراماسىنىڭ جالاۋىن كوتەرگەن ءادىلحان امانقۇل (75 كەلى) تورەشىلەردىڭ بىرىگىپ قابىلداعان شەشىمىنە سايكەس، جەكپە-جەكتىڭ ءۇش كەزەڭىندە دە باسىمدىق تانىتىپ، تايلاندتىڭ تاعى ءبىر وكىلى، قارسىلاسى افيست حانحوكرۋەانى 5:0 ەسەبىمەن تىزە بۇكتىردى.

مەدال ءۇشىن كۇرەستە تاعى ءبىر جەڭىسكە جەتكەن قازاقستاندىق بوكسشى تەمىرتاس ءجۇسىپوۆ (49 كەلى) بولدى. سپورتشى جاپونيالىق تومويا سۋبويدى 3:2 ەسەبىمەن جەڭىپ شىقتى.

1/8 فينالدا قازاقستان قۇراماسىنىڭ جەكپە-جەكتەرىن بەكداۋلەت يبراگيموۆ تۇيىندەدى. بوكسشى قىتايلىق گۋاڭ ۆاڭنان 5:0 ەسەبىمەن باسىپ وزدى.

وسىلايشا، قازاقستاندىق 10 سپورتشىنىڭ ىشىنەن 9 ى شيرەك فينالعا شىقتى (ريمما ۆولوسەنكو جەرەبەنىڭ ارقاسىندا ¼ فينالعا جەتتى).

28 -تامىز كۇنى جارتىلاي فينالعا جولداما الۋ ءۇشىن ءۇشىن رينگكە ءسانيا سۇلتان قىزى (57 كەلى)، ريمما ۆولوسەنكو (60 كەلى)، ازات ماحمەتوۆ (52 كەلى)، ءساماتالى تولتايەۆ (60 كەلى) جانە اسلانبەك شىمبەرگەنوۆ (59 كەلى) شىعاتىن بولادى.