قازاقستاندا زەينەتاقى كولەمى 2018 - جىلدىڭ 1 - قاڭتارىنان باستاپ، بازالىق زەينەتاقى جۇيەسىنە قاتىسۋ وتىلىنە قاراي بەلگىلەنەدى - ج. تولەگەنوۆا

الماتى. قازاقپارات - قازاقستاندا بازالىق زەينەتاقىنىڭ كولەمى ازاماتتىڭ زەينەتاقى جۇيەسىنە قاتىسۋ وتىلىنە قاراي تاعايىندالۋى - الەۋمەتتىك ادىلدىكتى قالپىنا كەلتىرەدى.

 بۇل تۋرالى الماتى مەنەدجمەنت ۋنيۆەرسيتەتىندە وتكەن Workshop - وقىتۋ سەمينارى بارىسىندا «ءبىرىڭعاي جيناقتاۋشى زەينەتاقى قورى» ا ق باسقارۋشى ديرەكتورى جانار تولەگەنوۆا مالىمدەدى.

«قازاقستاندا 2018 -جىلدىڭ 1 - قاڭتارىنان باستاپ، بازالىق زەينەتاقى جۇيەسىنە قاتىسۋ وتىلىنە قاراي جانە زەينەتكەرلىك جاسقا جەتكەن سوڭ عانا (58-63/63) بەلگىلەنەدى. ەگەر ازاماتتىڭ زەينەتاقى جۇيەسىنە قاتىسۋ ءوتىلى 10 جانە ودان از جىل بولاتىن بولسا، بازالىق زەينەتاقىنىڭ مولشەرى ەڭ تومەنگى كۇنكورىس دەڭگەيىنىڭ 50 پايىزىن قۇرايدى. ال 10 جىلدان جوعارى ءاربىر جىل ءۇشىن ونىڭ مولشەرى 2 پايىزعا جوعارىلاپ وتىرادى، ال ەگەر ەڭبەك ءوتىلى 35 جانە ودان دا كوپ جىلدى قۇرايتىن بولسا، وندا بازالىق زەينەتاقىنىڭ مولشەرى ەڭ تومەنگى كۇنكورىس دەڭگەيىنە تەڭ بولادى»، - دەدى ج. تولەگەنوۆا.

 سونىمەن قاتار، ول بازالىق زەينەتاقىنى تاعايىنداۋ بارىسىندا 1998 - جىلعى 1- قاڭتارعا دەيىنگى جانە ودان كەيىنگى كەزەڭدەگى بۇكىل ەڭبەك ءوتىلى ەسكەرىلەتىندىگىن باسا ايتتى. بۇل جەردە ەڭبەك ءوتىلى زەينەتاقى جارناسىن تولەۋمەن راستالۋى ءتيىس.

«قولعا الىنىپ جاتقان بۇل وزگەرىستەر ءبىر جاعىنان ەڭبەك ءوتىلى جوعارى بولسا دا، تابىسى تۋرالى مالىمەتى بولماعاندىقتان، ماردىمسىز زەينەتاقى الاتىن ازاماتتارعا قاتىستى الەۋمەتتىك ادىلدىكتى قالپىنا كەلتىرەدى. ەكىنشى جاعىنان وسكەلەڭ ۇرپاقتى ەڭبەك قاتىناستارىن راسىمدەۋگە ىنتالاندىرا تۇسەدى»، - ج. تولەگەنوۆا.

اۆتور: ايبوتا جاپپاربەرگەن