ارميا-2018: قازاقستاندا 11 ەلدەن كەلگەن ساربازداردىڭ حالىقارالىق جارىسى باستالدى
جالپى، «ارمي-2018» الەمنىڭ جەتى مەملەكەتىندە ءوتىپ جاتىر.
بايراقتى باسەكە «رۋحاني جاڭعىرۋ» اتتى تەاترلاندىرىلعان قويىلىمنان باستالدى. ساربازدار پاتريوتتىق ءان شىرقاپ، بيشىلەر قالىڭ كورەرمەنگە ونەرلەرىن پاش ەتتى. سونىمەن قاتار، پيلوتاج توپتارى مەن پاراشيۋتتىك كوماندالار دا اۋەدە ءتۇرلى قويىلىمدار كورسەتتى. ەلىمىزدىڭ قورعانىس ءمينيسترى سايىسقا قاتىسۋشى كوماندالارعا ساتتىلىك تىلەپ، حالىقارالىق اسكەري ويىندارىنىڭ اشىلۋىمەن قۇتتىقتادى.
«بۇگىندە حالىقارالىق ارميا ويىندارىن وتكىزۋدىڭ وزىندىك يگى ءداستۇرى قالىپتاستى. ءبىزدىڭ ەلدەردىڭ اسكەري قىزمەتشىلەرى ويىندار شەڭبەرىندە قارىم- قابىلەتتەرىن شىڭداپ، كاسىبي دەڭگەيىن ارتتىرۋدا. بيىلعى ارميا ويىندارىنا كەلگەن مارتەبەلى مەيماندارعا شەكسىز ريزاشىلىعىمدى جەتكىزىپ، ارميا ويىندارىنا قاتىسۋشى كوماندالارعا تەك تابىس تىلەيمىن!»، - دەدى ق ر قورعانىس ءمينيسترى ساكەن جاسۇزاقوۆ.
كەرزى ەتىك كيىپ، قارۋ اسىنعان شەتەلدىك اسكەرلەر قازاقستانعا تەك باس جۇلدە الۋعا كەلدىك دەيدى. ولار تارتىستى دودادا باقتارىن سىناپ، كىل مىقتىدان كىم مىقتىنى انىقتاۋعا بەكىنگەن. ءتىپتى وزدەرىنىڭ تەحنيكالارى مەن قارۋلارىن دا الىپ كەلگەندەر بار.
«ءبىز قارۋ جاراقتارىمىزدى ءوزىمىز الىپ كەلدىك. ءار كوماندانىڭ ءوز قۇرىلعىلارىمەن سايىسقا تۇسكەنى دۇرىس. بۇگىن اۋا رايى دا كەرەمەت بولىپ تۇر. جاقسى ونەر كورسەتەمىز دەپ ويلايمىن. جارىس اياقتالعانشا كۇن رايى بۇزىلماي تۇرسا ەكەن. قارسىلاستارعا ساتتىلىك تىلەيمىن!»، - دەدى ر ف ورتالىق اسكەري وكرۋگىنىڭ باسپا ءسوز قىزمەتى باسشىسىنىڭ ورىنباسارى اندرەي يگناتەۆ.
جارىستى قازاقستان، تاجىكستان، قىرعىزستان، بەلارۋس ساربازدارى باستادى. جاۋىنگەرلەر ءتۇرلى كەدەرگىلەردەن ءوتىپ، نىساناعا ءدال تيگىزۋلەرى كەرەك. كوماندالار ءبىرىنشى اينالىمدا پۋلەمەتپەن، ەكىنشىسىندە مينامەتپەن، سوڭعى اينالىمدا گراناتامەتپەن جانە اۆتوماتپەن اتادى. جەڭىسكە جەتۋ ءۇشىن جىلدامدىق پەن دالدىك قاجەت. ويتكەنى، نىسانادان ءمۇلت كەتكەن توپ قوسىمشا تاعى ءبىر اينالىمعا جىبەرىلەدى.
بيىلعى اسكەري ويىندارعا تورتكۇل دۇنيەنىڭ تۇكپىر- تۇكپىرىنەن 11 كوماندا كەلگەن. جارىسقا ۇزىن- ىرعاسى 200-دەن استام سارباز قاتىسىپ جاتىر. ولار بەس قارۋىن سايلاپ، سايىستا توپ جارۋعا بىلەك سىبانعان. ايتا كەتەيىك، حالىقارالىق اسكەري ويىندارى 9- تامىزعا دەيىن جالعاسادى.
ءومىر انۋاربەك، نۇرجان ورازبەكوۆ، «الماتى» تەلەارناسى، جامبىل وبلىسىنان
