استانا ءۇشىن 2017 - جىل تابىستى بولدى - اسەت يسەكەشيەۆ
«قۇرمەتتى استانالىقتار جانە قالا قوناقتارى! سىزدەردى جاڭا 2018 -جىلدارىڭىزبەن شىن جۇرەكتەن قۇتتىقتايمىن! حالقىمىز ءيت جىلىن جاقسىلىقتىڭ، بەرەكە مەن تاتۋلىقتىڭ جارشىسى دەپ قابىلداعان. ءبىزدىڭ دە كەلەر جىلدان كۇتەرىمىز كوپ، وتكەن جىلعا وكپەمىز جوق. 2017 -جىل استانا ءۇشىن تابىستى بولدى. ەكونوميكا، مادەنيەت، تۋريزم جانە الەۋمەتتىك سالالاردا دامۋدىڭ وڭ ديناميكاسىنا قول جەتكىزىلدى. ەكسپو كورمەسىن جوعارى دەڭگەيدە وتكىزدىك. مۇنىڭ ءبارى ەلباسىمىزدىڭ الدىمىزعا قويعان ناقتى تاپسىرمالارى مەن بارشا استانالىقتاردىڭ قاجىرلى ەڭبەگىنىڭ ارقاسى» دەلىنگەن حابارلامادا.
سونداي- اق، قالا باسشىسى ەلوردامىزدىڭ الاتاۋ باۋرايىنان ارقا توسىنە اۋىسقانىنا جيىرما جىل تولعانىن اتاپ ءوتتى.
«بۇل وتكەنىمىزدى سارالاپ، كەلەشەكتى باعامدايتىن ماڭىزدى ءسات. جيىرما جىلدا استانا قالاسى ادام تانىماستاي وزگەردى. استانانى دامىتۋدىڭ ۇزاق مەرزىمدىك جوسپارى ءوز مەرزىمىندە ورىندالىپ كەلەدى. جاڭا 2018 -جىل دا ەلىمىز بەن ەلوردا تاريحىندا ماڭىزدى وزگەرىستەرمەن ەستە قالادى دەپ سەنەمىن!» دەگەن ول ءسوز سوڭىندا.
