توقايەۆ: 2017-جىل ەلباسىنىڭ جاھاندىق ساياساتتاعى ءرولى مەن بەدەلىن ايشىقتاي ءتۇستى توقايەۆ
مۇنداي پىكىردى بۇگىن ق ر پارلامەنتى سەناتىنىڭ وسى جىلعى سوڭعى وتىرىسىن قورىتىندىلاعان پالاتا ءتوراعاسى قاسىم-جومارت توقايەۆ ايتتى، دەپ حابارلايدى قازاقپارات.
«بۇگىن ءبىز وسى جىلداعى پالاتانىڭ قورىتىندى وتىرىسىن وتكىزدىك. جالپى، ۇستىمىزدەگى جىل مەملەكەت دامۋىنىڭ جاڭا ساتىسىنا كوشۋگە بايلانىستى جۇزەگە اسىرىلعان جۇمىستاردىڭ كولەمى مەن قارقىنى جاعىنان ەرەكشە جىل بولدى. ەلباسىنىڭ تىكەلەي باستاماسىمەن كونستيتۋتسياعا ەنگىزىلگەن وزگەرىستەردىڭ ناتيجەسىندە پرەزيدەنت وكىلەتتىكتەرىنىڭ ءبىر قاتارىن بيلىكتىڭ اتقارۋشى جانە زاڭ شىعارۋشى تارماقتارى يەلەندى. بۇگىندە ەلىمىزدىڭ ەكونوميكالىق جانە تەحنولوگيالىق جاڭعىرۋىنىڭ يدەولوگيالىق نەگىزىنە اينالعان ەلباسىنىڭ رۋحاني جاڭعىرۋ تۇجىرىمداماسىن ىسكە اسىرۋ بويىنشا ناقتى قادامدار جاسالۋدا. بيىل ەلىمىزدىڭ ابىرويىن اسقاقتاتقان ايرىقشا جەتىستىكتەردىڭ ءبىرى الەمنىڭ نازارىن اۋدارعان «ەكسپو-2017» كورمەسىنىڭ جوعارى دەڭگەيدە ءارى تابىستى وتكىزىلگەنىن ماقتانىشپەن اتاپ وتۋگە بولادى. ۇستىمىزدەگى جىلى ەلوردامىزدا قازاقستان پرەزيدەنتىنىڭ جاھاندىق ساياساتتاعى ءرولى مەن حالىقارالىق بەدەلىن ايشىقتاي تۇسكەن شىۇ تاريحي ءسامميتى ءوتىپ، سيريا داعدارىسىن رەتتەۋگە ارنالعان استانا پروتسەسى باستالدى. وسىنداي ماڭىزدى شارالارعا تولى جىل ىشىندە ەلباسى بەلگىلەگەن ستراتەگيالىق مىندەتتەر اياسىندا اۋقىمدى جانە ناتيجەلى جۇمىس اتقارىلدى»، - دەدى سەنات ءتوراعاسى.
ونىڭ ايتۋىنشا، سەناتورلار ۇكىمەتپەن ءوزارا تىعىز بايلانىستا جۇمىس جۇرگىزىپ، ەلىمىز ءۇشىن وتە ماڭىزدى بولىپ تابىلاتىن 90 نان استام زاڭ جوبالارىن مۇقيات قابىلدادى. قابىلدانعان زاڭدار نەگىزىنەن پرەزيدەنتتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىن جانە مەملەكەتتىك باعدارلامالاردى ىسكە اسىرۋعا باعىتتالدى. ءبىرقاتار زاڭ توپتاماسى ەلباسىنىڭ ءۇشىنشى سەسسيانى اشۋ كەزىندە بەرگەن تاپسىرمالارىن ورىنداۋعا ارنالدى.
«اتاپ ايتقاندا، سالىق، جەر قويناۋىن پايدالانۋ، كەدەندىك رەتتەۋ تۋرالى كودەكستەر جاڭا رەداكتسيادا قابىلداندى. سونىمەن قاتار ەلىمىزدىڭ قۇقىق قوعاۋ قىزمەتىن جاڭعىرتۋعا، اقپارات جانە كوممۋنيكاتسيالار سالاسى ماسەلەلەرىن جەتىلدىرۋگە ارنالعان زاڭدار ۋاقىت تالابىن ساي پىسىقتالدى. زاڭ جوبالارىن سەناتتا تالقىلاۋ بارىسىنداعى قىزۋ پىكىرتالاستاردىڭ ناتيجەسىندە ولاردى ءبىرشاما جاقسارتاتىن سالماقتى تۇزەتۋلەر ەنىزىلگەنىن اتاپ ءوتۋ قاجەت. كونستيتۋتسيالىق رەفورمالار ناتيجەسىندە كۇشەيتىلگەن پارلامەنتتىك باقىلاۋ پارمەنىن پايدالانا وتىرىپ، سەنات قوعامدى تولعاندىرىپ جۇرگەن وزەكتى تاقىرىپتارعا ارنالعان بىرنەشە پارلامەنتتىك تىڭداۋلار وتكىزدى. وتكىر ماسەلەلەر كەڭىنەن تالقىلانعان جيىن بارىسىندا وسى باعىتتارداعى جۇمىستى جانداندىرۋ بويىنشا ءتيىستى مەملەكەتتىك ورگاندارعا ناقتى نۇسقاۋلار بەرىلىپ، ولاردىڭ ورىندالۋى باقىلاۋعا الىندى»، - دەدى ول.
ونىڭ سوزىنە قاراعاندا، سەناتورلار ەلىمىزدىڭ سىرتقى ساياسي باستامالارىن قولداۋ ماقساتىندا حالىقارالىق پارلامەنتتىك ۇيىمدار مەن قۇرىلىمدار اياسىندا ناتيجەلى جۇمىستار جۇرگىزىپ كەلەدى.
«ۇستىمىزدەگى جىلدىڭ سەنات ءۇشىن تاعى ءبىر ەرەكشەلىگى كونستيتۋتسيالىق تالاپتارعا سايكەس پالاتا قۇرامى جاڭارتىلىپ، تاجىريبەلى ماماندار جانە بەلگىلى قوعام قايراتكەرلەرى كەلىپ قوسىلدى. كونستيتۋتسيالىق وزگەرىستەرگە سايكەس پارلامەنتكە بەرىلگەن مۇمكىنشىلكتەر سالماعىن تەرەڭ سەزىنە وتىرىپ، سىزدەرى الداعى ۋاقىتتا زاڭ جوبالارىمەن جۇمىستى كاسىبي جوعارى جاۋاپكەرشىلىكپەن بەلسەندى تۇردە جالعاستىرا بەرۋگە شاقىرامىن. تۇتاستاي العاندا وسى جىلى سەنات كونستيتۋتسيالىق مىندەتتەرىن ويداعىداي اتقارىپ شىقتى دەپ زور سەنىممەن ايتۋعا بولادى»، - دەپ ءتۇيدى ءسوزىن قاسىم-جومارت توقايەۆ.
اۆتور: مارلان جيەمباي
