گۇلبانۋ ءازىمحانوۆا «الەم ارۋى-2017» بايقاۋىنا قاتىسادى- فوتو

 بۇل تۋرالى «قازاقستان ارۋى» بايقاۋىنىڭ ينستاگرامداعى رەسمي اككاۋنتىندا ءمالىم ەتىلدى، دەپ حابارلايدى قازاقپارات.

«ءبىزدىڭ سۇلۋىمىز، «قازاقستان ارۋى-2016» گۇلبانۋ ءازىمحانوۆا «الەم ارۋى» بايقاۋىنا قاتىسۋ ءۇشىن بۇگىن قىتايعا ۇشىپ باردى. فينال 18 - قاراشا كۇنى سانيا قالاسىندا وتەدى. قىزۋ دايىندىق جۇمىستارى جۇرۋدە»، - دەلىنگەن جازبادا.

گۇلبانۋدىڭ ءوزى دە قىتايدىڭ گۋاڭجوۋ قالاسىنا ۇشىپ كەلگەنىن حابارلادى. «بۇگىن مەنىڭ #missworld بايقاۋىنداعى العاشقى كۇنىم. تاڭعى اس ىشۋگە بارا جاتىرمىن. ايتپاقشى، مۇنداعى اۋا رايى جىپ- جىلى، بۇل ماعان ءسوزسىز ۇنايدى»، - دەپ جازدى ءازىمحانوۆا.

بيىلعى «الەم ارۋى» بايقاۋى وسىمەن 67- رەت وتكىزىلەدى.

 ۇيىمداستىرۋشىلاردىڭ ايتۋىنشا، بيىلعى بايقاۋ الەۋمەتتىك جەلىلەر مەن ينتەراكتيۆتىلىككە باسىمدىق بەرەتىن جاڭا فورماتتا وتپەك. ول Head-to-Head Challenge دەپ اتالادى جانە وعان 40 ۇزدىك قاتىسۋشىنىڭ 20-سى ىرىكتەپ الىنادى. 18 جاستاعى گۇلبانۋ ءازىمحانوۆا وتكەن جىلدىڭ جەلتوقسان ايىندا «قازاقستان ارۋى-2016» اتانعان ەدى. تىكەلەي ەفيردە كورەرمەندەر داۋىسىنىڭ ناتيجەسىندە جەڭىسكە جەتكەن گۇلبانۋ قازاقستاننىڭ ەڭ سۇلۋ ارۋى اتانىپ، بەس ميلليون تەڭگە كولەمىندە اقشالاي سىيلىق الدى. سونداي- اق «الەم ارۋى-2017» حالىقارالىق بايقاۋىندا قازاقستاندى تانىستىرۋ مۇمكىندىگىنە يە بولدى. كەيىنىرەك «قازاقستان ارۋى-2016» جەڭىمپازىنىڭ رەسمي فوتوسەسسياسى جاريالاندى.

 اۆتور: ايجان سەرىكجان قىزى