قازاقستان ساربازدارى «ارمي-2017» دوداسىندا كۇشى مىعىمدىعىمەن تاڭ قالدىردى - فوتو
دوداعا الەمنىڭ 29 ەلىنەن كەلگەن 150 اسكەري كوماندانىڭ سايىسىنا 4 مىڭنان استام اسكەري قىزمەتشى قاتىسقان بولاتىن، دەپ حابارلايدى «قازاقپارات» ح ا ا ءتىلشىسى.
قازاقستان قارۋلى كۇشتەرى قۇراماسى ارميا ويىندارىندا جالپى كوماندالىق ەسەپتە قىتاي مەن رەسەيدى العا جىبەرىپ، ءۇشىنشى ورىندى يەلەندە.
ماسكەۋدەگى «الابينو» پوليگونىندا سايىس مارەسىنە جەتكەن. قۇرامامىزدىڭ قورجىنىندا 3 التىن، 7 كۇمىس جانە 5 قولا مەدال بار. قازاقستان اسكەرىنىڭ ابىرويى ءۇشىن ارميا ويىندارىنا قازاقستاندىق 350 سارباز قاتىستى.
«ق ر ق ك كومانداسى قازاقستاندا، رەسەيدە، قىتايدا، ازەربايجان مەن بەلارۋستا وتكەن 17 بايقاۋعا قاتىستى. جالپى ەسەپتە، قىتاي مەن رەسەيدەن كەيىن ءۇشىنشى ورىن الدى. تاپسىرما ورىندالدى. كوماندا جاساقتاۋعا تىڭعىلىقتى دايىندالدىق. اسكەري قارۋىمىز دا ساقاداي ساي ەدى. ق ر قارۋلى كۇشتەرى سوڭعى 25 جىلدا جوعارى دەڭگەيگە جەتتى. زامانعا ساي تەحنيكالارىمىز بار. ءبىر سوزبەن ايتقاندا سايىسقا بارلىق قۇرلىقتىڭ اسكەريلەرى كەلدى، 29 ەل قاتىستى. قازاقستان بۇل سايىستا بارىن سالدى. مەن ماسكەۋدە حالىقارالىق قازىلار القاسىنىڭ مۇشەسى بولدىم. ءيا، كەيدە كەلىسپەۋشىلىكتەر دە بولىپ جاتتى. ءبىراق، ورتاق ءتىل تابىستىق. مەرگەندەر مەن تانكىشىلەر دە جارادى»، - دەيدى ق ك باس شتابى باستىعىنىڭ ءبىرىنشى ورىنباسارى ءامىر حالىقوۆ.
ۇيىمداستىرۋشىلاردىڭ بەرگەن باعاسى بويىنشا قازاقستان كومانداسى كورنەكى قۇرامالاردىڭ ءبىرى بولعان. «ارمي-2017» سايىسىندا قازاقستاندىق قۇرامانىڭ سوڭعىسىندا «تانكى بياتلونىنان» وزا شاۋىپ وزگە ەلدەردى تاڭ قالدىرعان ەكەن.
وندا تانكىشىلەرىمىز 1 ساعات 45 مينۋت 41 سەكۋند ناتيجەسىمەن ت-72 تانكىسىنىڭ بازالىق مودەلىندە جوعارى ماشىعىن كورسەتىپ، ەكىنشى ورىن العان. اسكەري لاۋازىمدى قىزمەتكەرلەر وزىق تانكىلەرى بار ەلدەردى ارتتا قالدىرعان قازاقستان تانكىشىلەرىنىڭ كۇمىسى التىنعا تەڭ دەسەدى.
«ءبىز ارميا ويىندارى اياسىندا بەلارۋستا دا سايىسقا تۇستىك. بايقاۋ 9 جىل قاتارىنان وتۋدە. ارميا ويىندارى 5 كەزەڭنەن تۇردى. جاۋىنگەرلەردەن كاسىبي داعدىسى، مەرگەندىگى، دەنە دايىندىعى، قايسارلىعى مەن پاتريوتتىعى تالاپ ەتىلدى. بەس كەزەڭنەن تۇراتىن سايىستا ءۇش كەزەڭدە ءبىرىنشى، جالپى ەسەپتە ەكىنشى ورىن الدى. ءار كەزەڭ بويىنشا ءبىزدىڭ ساربازدار ەرەكشە قيمىل-ارەكەتىمەن تاڭ قالدىردى. كەدەرگىلەردى باعىندىرۋ كەزەڭىندە ءتىپتى باسقا ەلدىڭ قاتىسۋشىلارى ءبىزدىڭ ەلدىڭ جاۋىنگەرلەرىنىڭ مىعىمدىعىنا قاراپ «ساربازدارىڭا قانداي تاماق بەرەسىڭدەر؟» دەپ تاڭ قالدى.
ولاردىڭ ءتىپتى قارقىنى ۇدەي تۇسكەن كەزدە ءتىپتى تاڭ-تاماشا قالعان ەدى. بۇل ناتيجەنى جاقسارتا تۇسكىمىز كەلەدى»، - دەيدى ق ر ق ك باس شتابى سەرجانتتار قۇرامىمەن جۇمىس باسقارماسىنىڭ باستىعى تەمىربەك حالىقوۆ.
اۆتور: ايان بەكەن ۇلى
