ەكسپو-2017: اۆستريا وكىلدەرى ەنەرگيا الۋ تاجىريبەسىمەن ءبولىستى
بۇگىن استاناداعى ەكسپو-2017 كورمەسىندە وسى ەلدىڭ ۇلتتىق كۇنى مەرەكەسى تويلانۋدا، دەپ حابارلايدى قازاقپارات ءتىلشىسى.
«اۆستريانى مۋزىكاسىز جانە ۆەلوسيپەدسىز ەلەستەتۋ مۇمكىن ەمەس. سول سەبەپتى ءبىز پاۆيلوندى جاساقتاۋ بارىسىندا وسى ەكى نارسەنى بارىنشا پايدالانىپ، بالامالى ەنەرگيانىڭ ماڭىزدىلىعىن كورسەتۋگە تىرىستىق. بۇل جەردە ەنەرگيا ءوندىرۋ ءۇشىن بارلىق ينستاللياتسيالاردى قوزعاۋ قاجەت، اينالدىرۋ كەرەك جانە تاعىسىن تاعى. سەبەبى ەنەرگيانىڭ باستى كوزى - ادامنىڭ ءوزى، ونىڭ اقىلى، جۇرەگى مەن كۇشى. سونىڭ ءبارى سارقىلماس ەنەرگيا كوزى بولىپ سانالادى»، - دەيدى گ ي د اناستاسيا بوندارەنكو.
پاۆيلوندا ۆەلوسيپەد باسقىشىن اينالدىرعاندا قانشا ەنەرگيانى وندىرۋگە بولاتىنىن دا بىلۋگە بولادى.
ماسەلەن، جەڭىل كولىكتى ءبىر شاقىرىم جەرگە ەنەرگيامەن قامتاماسىز ەتۋ ءۇشىن باسقىشتى 12 ساعات بويى اينالدىرۋ قاجەت. سول سياقتى ءبىر ۇيگە قاجەتتى ەنەرگيانى 5000 ساعات وندىرۋگە تۋرا كەلەدى. ال كومپيۋتەردە ءبىر كليك جاساۋ ءۇشىن ۆەلوسيپەد باسقىشىن 52 سەكۋند اينالدىرسا دا جەتەدى.
بۇدان بولەك، اتكەنشەكتەردى تەۋىپ، مۋزىكانى شىعارۋعا مۇمكىندىك بار. اۆستريا تاريحىمەن تانىسۋ ءۇشىن ۆەلوسيپەدتىڭ دوڭعالاعىن اينالدىرۋ قاجەت. سارقىراما سۋدى كورگىسى كەلەتىندەرگە دە ءبىر دوڭگەلەكتى قولمەن اينالدىرۋعا تۋرا كەلەدى. وسىلايشا، اۆستريالىقتار كينەتيكالىق ەنەرگيانىڭ، ياعني قوزعالىس كۇشىنىڭ ماڭىزدىلىعىن كورسەتىپ وتىر.
ايتا كەتەيىك، بۇگىن اۆستريا رەسپۋبليكاسىنىڭ ۇلتتىق كۇنى اياسىندا شاتىرلى كونسەرت زالىندا سالتاناتتى شارا ۇيىمداستىرىلدى. سول جەردە استاناعا العاش رەت كەلگەن الەمگە ايگىلى «اۋليە فلوريان» ۇلدار حورى ونەر كورسەتىپ، قازاقستاننىڭ ءانۇرانىن ورىندادى.
اۆتور: ارمان اسقاروۆ
