ەكسپو-2017: فرانسيا ەلەكتر ەنەرگياسىمەن جۇرەتىن كولىكتەرىن تانىستىرۋدا - فوتو
«استانا ەكسپو-2017 كورمەسىندەگى فرانسيا پاۆيلونى فرانسۋزدىق جەتەكشى كاسىپورىنداردى مەملەكەت قامقورلىعىنىڭ اياسىندا بىرىكتىرەدى. بۇعان قوسا، ولاردىڭ كورمە اياسىندا يننوۆاتسيالىق تەحنولوگيالار سالاسىنداعى ءبىلىمىن، داعدىسىن جانە الەۋەتىن شىنايى كورسەتۋگە مۇمكىندىك بەرەتىن الاڭ قىزمەتىن اتقارادى. جەتەكشى كومپانيالارىمىز حالىقارالىق ارەنادا ەلىمىزدىڭ بەدەلىن ارتتىرۋعا دا ىقپال ەتەدى»، - دەدى ب ا ق وكىلدەرىنە فرانسيا پاۆيلونىنىڭ باس كوميسسارى پاسكال لورو.
اۋماعى 1084 شارشى مەتر بولاتىن فرانسيا پاۆيلونىندا ۇزدىك فرانسۋزدىق كومپانيالار مەن ستارتاپ وكىلدەرىنىڭ ەنەرگەتيكا سالاسىنداعى يننوۆاتسيالىق تەحنولوگيالارى كورسەتىلەدى.
ولاردىڭ ماقساتى - الەم قاۋىمداستىعىنىڭ نازارىن ەنەرگيا تۇتىنۋدىڭ ۇنەمدى ۇلگىلەرىن قولدانۋ قاجەتتىگىنە اۋدارۋ جانە كليماتتىڭ جىلىنۋ پروتسەسىن باياۋلاتۋعا قابىلەتتى شەشىمدەردى ۇسىنۋ.
پاۆيلون «ەكوقالا»، «جاڭاراتىن ەنەرگيا»، جانە «ەكولوگيالىق كولىك» تاقىرىپتارى توڭىرەگىندە جوبالانعان جانە ءارقايسىسى فرانسۋز كاسىپورىنىنىڭ ساراپتامالىق سالاسى سانالادى.
پاۆيلوننىڭ ءبىرىنشى قاباتىنداعى 7 بولىك كورمە قوناقتارىنا «جاسىل» ەنەرگەتيكا سالاسىنداعى جاڭا تەحنولوگيالارمەن تانىسۋعا مۇمكىندىك بەرەدى.
ءار بولىكتىڭ قابىرعالارىن پاۆيلوننىڭ باستى سەرىكتەسى سانالاتىن Total, Peugeot, Vicat سىندى كومپانيالارى ءبولىپ الىپ، وندا الەم وركەنيەتىنىڭ دامۋىنا ۇلەس قوسقان فرانسيانىڭ كورنەكتى قايراتكەرلەرىنىڭ بارلىق شىعارماشىلىعىنان سىر شەرتەتىن دەرەكتەردى ورنالاستىرعان.
سونىمەن قاتار پاۆيلون قوناقتارى فرانسۋزدىق كومپانيا ازىرلەگەن دىبىس سىڭىرگىش زاماناۋي سوڭعى ۇلگىدەگى ماتەريالدارمەن تانىس بولا الادى.
مۇنان بولەك، Peugeot كومپانياسىنىڭ ەلەكتر ەنەرگياسىمەن جۇرەتىن اۆتوموبيلىن، ۆەلوسيپەدى مەن ساموكاتىن، ەلەكتروسكۋتەرىن كورۋگە بولادى.
ايتا كەتەرلىگى، ەكسپو-2017 حالىقارالىق مامانداندىرىلعان كورمەسى اياسىنداعى فرانسياننىڭ ۇلتتىق كۇنى 21- ماۋسىمدا وتەدى. ونىڭ اياسىندا كورمە قوناقتارى سيرك، كابارە، رەترو- بۋدۋارلاردى كورە الادى. فرانسيانىڭ وڭتۇستىك-باتىسى مەن برەتان ءداستۇرلى مۋزىكاسى وينالادى. قازاق ۇلتتىق ونەر ۋنيۆەرسيتەتىنىڭ ستۋدەنتتەرى فرانسۋز ستيلىندە ءان شىرقايدى.
اۆتور: مارلان جيەمباي
