ەرلان قارين ەكسپو-2017 كورمەسى اشىلۋ ءراسىمىنىڭ ءتۇسىرىلىمى قالاي جۇرگىزىلگەندىگىن ايتتى
بۇل جايىندا «قازاقستان» ت ر ك- نىڭ باسقارما ءتوراعاسى ەرلان قارين فەيسبۋكتەگى پاراقشاسىندا جازدى، دەپ حابارلايدى قازاقپارات.
«سونىمەن، ەكسپو-2017 اشىلۋ ءراسىمى اياقتالدى! ءبىز بۇل وقيعانى ۇزاق كۇتتىك جانە وسىعان ءبىراز دايىندالدىق، اسىرەسە سوڭعى كۇندەرى. بۇل جۇمىسقا كوپتەگەن كۇشتەر جۇمىلدىرىلعان بولاتىن. وسى شارانى بىرىگىپ جوعارعى دەنگەيدە ۇيىمداستىرعان بارلىق تەحنيكالىق، شىعارماشىلىق قىزمەتتەردىڭ جانە بىرىككەن تەلەۆيزيالىق- شىعارماشىلىق توپتاردى - ЕХРО-2017، «قازاقستان» ترك، «ەكسپو مەديا- ورتالىعىنىڭ، سونىمەن قاتار وزگە تەلەارنالارداعى ارىپتەستەرىمىزدىڭ جۇمىسىن اتاپ وتكىم كەلەدى»، - دەپ جازدى ول.
وسى رەتتە ەرلان قارين «قازاقستان» كورپوراتسياسى رەسمي تۇردە بۇل حالىقارالىق كورمەنىڭ باستى تاراتۋشىسى بولعاندىقتان كۇردەلى، ۇلكەن جاۋاپكەرشىلىكتى تالاپ ەتەتىن ميسسيا جۇكتەلگەندىگىن اتاپ وتكەن. قىسقا ۋاقىت ىشىندە ءتۇسىرۋ نۇكتەلەرى انىقتالىپ، ءتيىستى سىزبالارى دايىندالعانىن، تەحنيكالىق جوسپار ازىرلەنىپ، قاجەتتى رەسۋرستار جۇمىلدىرعانىن ايتقان.
«نەگىزگى وقيعالار ءار ءتۇرلى لوكاتسيالاردا وتكەنى قيىندىق تۋدىردى: باسىندا «سفەرانىڭ» ىشىندە، سوسىن «كونگرەسس- حولدا»، ول جەردە ءبىز ماسشتابتى كورىنىستى ءتۇسىرىپ، ونى ادەمىلەپ جەتكىزۋىمىز كەرەك بولدى. سەبەبى، پروتوكولدى تۇسىرىلىمدەردىڭ تالاپتارىن ساقتاي وتىرىپ اشىلۋ ءراسىمىن ادەمى جەتكىزۋدى قامتاماسسىز ەتۋگە قاجەت ەدى. «ەكسپو» تەرريتورياسى ايتارلىقتاي اۋقىمدى بولعاندىقتان، بىزگە ءبىر مەزەتتە ماسشتابتى جانە جان- جاقتا ءوتىپ جاتقان ناقتى ارەكەتتەردى كورسەتۋ كەرەك- ءتىن. جالپى، ءتۇسىرىلىم ءۇشىن جىلجىمالى 7 ستانسيا، 57 كامەرا، ونىڭ ىشىندە ارناۋلى تىكۇشاق پەن درون، 2 تروسستىق 2-D كامەرا پايدالانىلدى. وسىعان دەيىن بولعان ەشبىر شارادا وسىنشاما كوپ جانە ۇلكەن تەحنيكالىق رەسۋرستار قولدانىلمادى. سوندىقتان دا، كاسىبي تۇرعىدان، ءبىز ءۇشىن بۇل تاعى ءبىر جاڭا سىناق بولدى...» ، - دەدى كورپوراتسياسى باسشىسى.
ونىڭ ايتۋىنشا، تۇسىرىلىمدەر بىرنەشە لوكاتسيالاردان جۇرگىزىلدى. ءار جەردەگى جىلجىمالى ستانسالار ارقىلى سيگنالى «ەكسپو» تەرريتورياسىنداعى مەديا- ورتالىققا جىبەرىلىپ، سول جەردەن «قازمەديا» ورتالىعىندا ورنالاسقان «قازاقستان» كورپوراتسياسىنىڭ 9- ستۋدياسىنان جالپى بەينە باسقا ارنالارعا تاراتتىلدى. سونىمەن بىرگە كورپوراتسيا بىرنەشە سايتتاردا دا ونلاين- ترانسلياتسيالار جۇرگىزدى. حالىقارالىق اقپارات اگەنتتىكتەر «قازاقستان» تەلەارناسىنىڭ بەينەجازبالارىن ونلاين- ترانسلياتسيا ءۇشىن الىپ وتىردى.
«ءتورت ساعاتقا سوزىلعان اشىلۋ ءراسىمى ءبىر ساتتە ءوتىپ كەتتى. ءبىراق، وزدەرىڭىز بىلەسىزدەر، وسىنداي اۋقىمدى شارالار الدىندا ۇزاق، اۋىر، كوزگە كورىنبەيتىن جۇمىس جۇرگىزىلەدى. سوندىقتان وسى شارانى دايىنداۋعا اتسالىسقان بارلىق ازاماتتاردى جانە ءوز ارىپتەستەرىمدى تاعى ءبىر قۇتتىقتاپ، شىن جۇرەكتەن العىس ايتقىم كەلەدى!»، - دەدى ەرلان قارين.
اۆتور: مارلان جيەمباي
