ەكسپو-2017: تايلاند پاۆيلونىندا ماسساج سالونى بولادى
شاراعا تايلاندتىڭ ەنەرگەتيكا مينيسترلىگىنىڭ تۇراقتى حاتشىسى - ۇلتتىق پاۆيلوننىڭ كوميسسارى ارەپوونگ بحووچا مەن قازاقستان ەلشىسى مارات ەسەنبايەۆ قاتىستى، دەپ حابارلايدى قازاقپارات ءتىلشىسى ق ر سىرتقى ىستەر ۆەدومستۆوسىنىڭ باسپا ءسوز قىزمەتىنە سىلتەمە جاساپ. تايلاندتىڭ ۇلتتىق پاۆيلونى «بارلىعىنا ارنالعان بيوەنەرگيا» تاقىرىبىنا ارنالادى. سونداي-اق، ول جەردە تاي تاعامى مەيرامحاناسى مەن تاي ماسساجى سالونى بولادى. ال «مۋاي تاي» شەبەرلەرى تاي بوكسىنىڭ شوۋىن وتكىزەدى.
وسى ەلدىڭ كورمەدەگى ۇلتتىق كۇنى قازاقستان مەن تايلاند اراسىنداعى ديپلوماتيالىق قاتىناستاردىڭ 25 جىلدىعىنا سايكەس كەلىپ وتىر. سونىڭ اياسىندا ءبىرقاتار مەرەكەلىك شارالاردى وتكىزۋ جوسپارلانعان. 
«ەكسپو-2017» كەزىندە قازاقستان- تايلاند ۇكىمەتارالىق كوميسسياسىنىڭ 3- وتىرىسى وتەدى.
وسىعان وراي، استاناعا تايلاندتىڭ ەنەرگەتيكا، ساۋدا، تۋريزم جانە سپورت مينيسترلەرى، سونىمەن قاتار سىرتقى ىستەر، مادەنيەت، قارجى مينيسترلىكتەرى، ينۆەستيتسيالار جونىندەگى اگەنتتىگى باسشىلىعى كەلەدى. كوميسسيا وتىرىسى اياسىندا ەكى ەلدىڭ بيزنەس- فورۋمى، سونداي-اق ءبىرقاتار مادەني شارالار ۇيىمداستىرىلادى.
اۆتور: ارمان اسقاروۆ
