ەلىمىزدەگى ءبىرىنشى ۆيتسە-پرەمەردىڭ نەمەرەسى لوندوندا «ك س ر و-2017» ۆيتسە-ارۋى اتاندى - فوتو

استانا. قازاقپارات - لوندوندا ءبىلىم الىپ جۇرگەن الماتىلىق بويجەتكەن كاميليا ەسەنعارينا «ك س ر و ارۋى - 2017» بايقاۋىنىڭ ۆيتسە-ارۋى اتاعىن جەڭىپ الدى دەپ حابارلايدى NUR. KZ پورتالى.

بۇل تۋرالى بويجەتكەن ءوزىنىڭ Instagram پاراقشاسىندا حابارلاپ، قۇتتىقتاۋلارعا العىس بىلدىرگەن.

«ك س ر و ارۋى» بايقاۋى بريتانيادا 2013-جىلدان باستاپ وتكىزىلۋدە. وعان بۇرىنعى ك س ر و ەلدەرىنىڭ ارۋلارى قاتىسادى. بۇل جىلى بايقاۋدا 16 ەلدىڭ ارۋى باق سىنادى.

بايقاۋدا رەسەيلىك بويجەتكەن اناستاسيا بويل جەڭىمپاز اتاندى.

ال ۆيتسە-ارۋ اتانعان قازاقستاندىق كاميليا سۋررەي ۋنيۆەرسيتەتىندە ءبىلىم الىپ جاتىر.

بايقاۋ قاتىسۋشىلارىنان بولەك ولگا بۋزوۆا مەن يرينا دۋبتسوۆا سەكىلدى جۇلدىزداردىڭ ونەر كورسەتۋى كەشتى قىزىقتى ەتە ءتۇستى.

كاميليا ەسەنعارينا - قازاقستاننىڭ مەملەكەت قايراتكەرى، ترانسپورتتىڭ العاشقى ءمينيسترى جانە قازاقستاننىڭ ءبىرىنشى ۆيتسە-پرەمەرى نىعماتجان ەسەنعاريننىڭ نەمەرەسى.

پرەمەر- مينيستر ورىنباسارى قىزمەتىن ول 1994-1997-جىلدار ارالىعىندا اتقارعان.