ەكسپو-2017 كورمەسى كەزىندە ەلورداعا وڭتۇستىك قازاقستاننان قانشا توننا بالمۇزداق جەتكىزىلەدى؟
«ەكسپو-2017» حالىقارالىق كورمەسى جاقىنداعان سايىن دايىندىق جۇمىستارى دا كۇشەيتىلە ءتۇستى. بۇل اۋقىمدى ءىس-شاراعا ءتۇرلى وڭىرلەردىڭ كاسىپكەرلەرى دە ازىرلەنىپ جاتىر.
شەتەلدىك قوناقتار مەن وتانداستارىمىز ەلوردا تورىندە تەك عىلىمي جەتىستىكتەردى كورىپ قانا قويماي، قازاقستاندىق وندىرۋشىلەردىڭ ازىق-تۇلىك ونىمدەرىن دە تۇتىنادى. سول كومپانيالاردىڭ اراسىندا وبلىسىمىزداعى بالمۇزداق شىعاراتىن ەكى كاسىپورىن بار»، - دەلىنگەن ماقالادا.
وبلىستىق اۋىل شارۋاشىلىعى باسقارماسىنىڭ مالىمەتىنە سۇيەنسەك، كورمەگە وراي استاناعا «بالمۇزداق» جانە «ازيا حولود» جاۋاپكەرشىلىگى شەكتەۋلى سەرىكتەستىكتەرى مامىر ايىندا 5 توننادان، جالپى، 10 تونناداي بالمۇزداق جىبەرەدى.
سۇرانىسقا بايلانىستى جوسپار وزگەرىپ، بالمۇزداق كولەمى ارتۋى دا، كەمۋى دە مۇمكىن. تاياۋدا قوس كومپانياعا باسقارمادان رەسمي حات جولدانىپ، جوسپار جاسالدى. ەڭ باستىسى، وتاندىق تاۋار وندىرۋشىلەردىڭ «ەكسپو-2017» كورمەسىنە كوپتەپ شاقىرىلۋى بىزدىڭ كاسىپكەرلەر ءۇشىن وتە تيىمدى.
كورمەنى ۇيىمداستىرۋشىلاردىڭ تاڭداۋى بۇل كومپانيالارعا بەكەر ءتۇسىپ وتىرعان جوق. تولە ءبي اۋدانىندا ورنالاسقان «بالمۇزداق» ج ش س- نىڭ ونىمدەرى ساپاسى مەن تىل ۇيىرەر ءدامى ارقىلى تالايلاردى تامساندىرىپ ۇلگەرگەن.
1987-جىلى اشىلعان «بالمۇزداق» ج ش س تاۋەلسىزدىك العاننان كەيىن قاناتىن كەڭگە جايىپ، ءونىم كولەمى ارتا ءتۇستى. ەلىمىزدىڭ بىرنەشە وبلىسىنىڭ نارىعىن جاۋلاعان تولەبيلىكتەر كورشىلەس قىرعىزستانعا دا بالمۇزداق جىبەرگەن.
«ازيا حولود» ج ش س دە بۇگىندە ءوز ونىمدەرىمەن جۇرتشىلىققا ۇناپ ءجۇر. شىمكەنتتىڭ بالمۇزداعىنا سۇرانىس جوعارى. ءۇش ايدا استاناداعى كورمەگە 5 ميلليونداي ادام كەلەدى دەگەن بولجام بار.
دەمەك، الداعى ۋاقىتتا «بالمۇزداق» پەن «ازيا حولود» ءوندىرىس كولەمىن ۇلعايتۋعا كۇش سالۋى مۇمكىن.
