شاڭحايدا ەكسپو-2017 تانىستىرىلدى
شاراعا شاڭحاي قالاسى كوممەرتسيا باسقارماسىنىڭ ءتوراعاسى دۋن چاو، شاڭحاي حالىقتىق جينالىسى 14- شاقىرتۋىنىڭ تۇراقتى مۇشەسى، قىتاي حالىقارالىق ساۋدا پالاتاسى ەكسپو دەپارتامەنتىنىڭ ديرەكتورى گە تسزە جانە 100 دەن استام ءىرى قىتايلىق كومپانيا وكىلدەرى قاتىستى.
شاڭحاي قالاسىنداعى ق ر باس كونسۋلى جوشىحان قىراۋبايەۆ ءوز سوزىندە قازاقستان-قىتايلىق قاتىناستاردىڭ دامۋى، ونىڭ ىشىندە «جىبەك جولى ەكونوميكالىق بەلدەۋى» مەن «نۇرلى جول» باعدارلاماسىنىڭ ءتۇيىسۋى، وندىرىستىك قۋات سالاسىنداعى ءوزارا ءىس-ارەكەت جايىندا ايتتى.
«بىرلەسكەن كۇشپەن «قورعاس» شەكارا ىنتىماقتاستىعى جانە «قورعاس - شىعىس قاقپا» ا ە ا دامۋدا. «باتىس قىتاي - باتىس ەۋروپا» جولىنىڭ قۇرىلىسى اياقتالۋعا جاقىن، ليانيۋنگان پورتىندا قازاقستاندىق-قىتاي تەرمينالى جۇمىس ىستەيدى. ول كەلەشەكتە ساۋدانى كەڭەيتۋ، قىتاي مەن ەۋروپا اراسىنداعى كەڭىستىكتە كولىك تاسىمالىن جەدەلدەتۋ ءۇشىن مۇمكىندىكتەر اشادى»، - دەدى ول.
ديپلومات قازاقستان وڭىردە ءبىرىنشى بوپ ەكسپو حالىقارالىق مامانداندىرىلعان كورمەسىن وتكىزۋگە قۇقىق العانىن ەسكە سالدى. بۇل جوبا قازاقستاننىڭ «جاسىل» ەكونوميكاعا كوشۋى ءۇشىن سەرپىن بەرەدى جانە جاڭارتىلعان ەنەرگەتيكا سالاسىنداعى يننوۆاتسيا ءۇشىن الاڭ بولادى.
بۇگىندە كورمەگە 100 دەن استام ەل، 20 حالىقارالىق ۇيىم قاتىساتىنىن راستادى. «بولاشاق ەنەرگياسى جاسىل جىبەك جولى» تاقىرىبىمەن قىتاي پاۆيلونى جوعارى باعاعا يە. بۇدان باسقا 2017-جىل استاناداعى قىتاي تۋريزمى جىلى بولىپ جاريالاندى»، - دەپ اتاپ ءوتتى ج. قىراۋبايەۆ.
