قازاقستاندا «بەكىرە-2017» بالىق قورعاۋ اكسياسى باستالدى

استانا. قازاقپارات - اتىراۋ، ماڭعىستاۋ جانە باتىس قازاقستان وبلىستارىندا باعالى بالىق تۇرلەرىنىڭ ۋىلدىرىق شاشۋ كەزەڭىندە وتەتىن «بەكىرە-2017» جىل سايىنعى اكسياسى باستالدى، دەپ حابارلايدى «قازاقپارات» ح ا ا ءتىلشىسى ق ر اۋىل شارۋاشىلىعى مينيسترلىگىنىڭ باسپا ءسوز قىزمەتىنە سىلتەمە جاساپ.

ۆەدومستۆودا اتاپ وتكەندەي، 31- مامىرعا دەيىن جالعاساتىن اتالمىش اكسيا اياسىندا براكونەرلىك فاكتىلەرى بولۋى مۇمكىن جەرلەردە ستاتسيونارلىق جانە جىلجىمالى بەكەتتەر، سونداي-اق موبيلدى رەيدتىك توپتار قۇرىلعان.

بيىلعى جىلى نەگىزگى كۇشتى كاسپي تەڭىزىنىڭ جاعالاۋى مەن ايدىندارىنا، جايىق پەن قيعاش وزەندەرىنىڭ ساعالارىنا جۇمىلدىرۋ كوزدەلۋدە.

بۇدان بولەك، اۋەجايلاردا، تەمىرجول ۆوكزالدارى مەن ءىرى تاسجولداردا بالىقتار مەن بالىق ونىمدەرىن ەلىمىزدەن الىپ شىعۋ ارەكەتتەرىنە باقىلاۋ كۇشەيتىلەدى. سونداي-اق، استانا، الماتى، اتىراۋ، اقتاۋ، اقتوبە، ورال قالالارىندا بالىق جانە بالىق ونىمدەرىن زاڭسىز ساتۋ ورىندارى تۋرالى اقپاراتتار جينالىپ، مونيتورينگ جاسالادى.