قىزىلوردادا «ۋنيۆەرسيتەت ارۋى-2017» انىقتالدى
بايقاۋدا تال شىبىقتاي بۇرالعان، اقىلىنا كوركى ساي 15 قىز ءوز ونەرلەرىن ورتاعا سالىپ، ءتۇرلى ساۋالدارعا مۇدىرمەستەن جاۋاپ بەردى.
وسى ۋاقىتقا دەيىن 40 قىزدىڭ ىشىنەن ىرىكتەلگەن ارۋلار ساحناداعى تاپقىرلىقتارى مەن تاباندىلىقتارىنىڭ ارقاسىندا وزدەرىنىڭ وسال ەمەستىكتەرىن اڭعارتتى. كورەرمەندەر كوپ جينالعان بايقاۋدا جانكۇيەرلەر ەرەكشە بەلسەندىلىك تانىتتى.
وتىزدان اسا دەمەۋشى بايقاۋدىڭ جوعارى دەڭگەيدە وتۋىنە اتسالىستى. ءادىل قازىلار القاسىنىڭ قورىتىندىسىمەن فيلولوگيا، تاريح جانە قۇقىق فاكۋلتەتىنىڭ 1-كۋرس ستۋدەنتى ايجان اياعان قىزى «ۋنيۆەرسيتەت ارۋى-2017» اتانسا، وسى فاكۋلتەتتىڭ ستۋدەنتى ارداق تالانت قىزى ءبىرىنشى ۆيتسە-ميسس تيتۋلىنا لايىق دەپ تانىلدى.
ال حورەوگرافيا ماماندىعىنىڭ 2-كۋرس ستۋدەنتى ارۋجان مەيىربەك قىزى ەكىنشى ۆيتسە-ميسس اتاعىن مىسە تۇتتى. سونداي-اق «كورەرمەندەر كوزايىمى» نوميناتسياسى جاراتىلىستانۋ فاكۋلتەتىنىڭ ستۋدەنتى ايدانا ءابيبوللا قىزىنا، «قىز جىبەك ارۋى» نوميناتسياسى اينۇر امانتاي قىزىنا بۇيىردى.
اۆتور: ەلۋباي اۋەزوۆ
