ەكسپو -2017 كورمەسىنە كىمدەر تەگىن كىرە الادى؟
2016-جىلدىڭ جەلتوقسان ايىندا «كەرۋەن»، «حان شاتىر»، «MEGA Park»، «MEGA سەنتر الماتى» ويىن-ساۋىق ورتالىقتارىندا جانە ودان ەرتەرەك 15 مەلومان ساۋدا جەلىسىندە، سونداي-اق، «قازپوشتانىڭ» 981 بولىمشەسىندە رەسمي تۇردە بيلەت ساتىلۋى باستالدى.
ال اعىمداعى جىلدىڭ ناۋرىز ايىنان باستاپ قازاقستاننىڭ بارلىق وبلىس ورتالىقتارىندا رەسمي تۇردە بيلەت ساتاتىن 17 كاسسا اشىلدى. ايتا كەتەرلىگى، كورمەنىڭ اشىلۋىنا تۋرا ءبىر جىل قالعاندا - 2016-جىلدىڭ 10- ماۋسىمىنان باستاپ بيلەتتەردىڭ ونلاين-ساتىلىمى باستالعانى بەلگىلى.
ەندى كورمەگە كەلۋگە نيەت تانىتقانداردىڭ بارلىعى بيلەتتەردى تەك ونلاين تاپسىرىسپەن عانا ەمەس، ەلىمىزدىڭ بارلىق وڭىرلەرىندە كاسسالار ارقىلى ساتىپ الا الادى. ەستەرىڭىزگە سالا كەتەيىك، جۇمىس كۇندەرىنە بەلگىلى داتا قويىلعان بيلەتتەر قۇنى -4000 تەڭگە، دەمالىس كۇندەرىنە 6000 تەڭگە. ال، بەلگىلى داتاسى قويىلماعان بيلەتتەر قۇنى 2000 تەڭگەگە قىمبات.
ستۋدەنتتەر، مەكتەپ وقۋشىلارى، زەينەتكەرلەر، كوپبالالى انالار ەكسپو-2017 كورمەسىنە بيلەتتەردى 50 پايىزدىق جەڭىلدىكپەن السا، سوعىس ارداگەرلەرى، التى جاسقا دەيىنگى بالالار، جەتىم بالالار مەن كەز-كەلگەن توپتاعى مۇگەدەكتىگى بار جەڭىلدىك قاراستىرىلعان توپتاعى قازاقستان ازاماتتارى كورمەگە تەگىن كىرە الادى. ايتا كەتەرلىگى، مۇنداي جەڭىلدىك قاراستىرىلعان بيلەتتەردى تەك كورمە بارىسىندا، كورمەگە كەلەتىن كۇنى، كورمەنىڭ كىرەبەرىسىندە ورنالاسقان كاسسالاردان جەكە كۋالىك پەن جەڭىلدىك قاراستىرىلعانىن راستايتىن قۇجاتتى كورسەتۋ ارقىلى الۋعا بولادى.
ءبىز رەسەيدىڭ ءبىرقاتار وڭىرلەرىندە ەكسپو-2017 رەسمي كاسسالارىن اشتىق. ماسكەۋدەگى بيلەت ساتىلاتىن ورىندار لۋبيانكادا، ورتالىق بالالار دۇكەنىندە ورنالاسقان بولسا، پەتەربۋگتە گوروحوۆوي كوشەسى 6 مەكەن-جايى بويىنشا كاسسير رۋ عيماراتىندا ورنالاسقان.
سونداي-اق، قازان، تومەنگى نوۆگورود، ەكاتەرينبۋرگ، نوۆوسىبىر، سوچي قالالارىنىڭ ءىرى ساۋدا ورتالىقتارىندا دا كاسسالار اشىلدى. ودان وزگە رەسەيدىڭ ءىرى قالالارىندا ەكسپو-2017 كورمەسىنە ارنالعان بيلەت ساتاتىن 38 نۇكتە اشىلدى، - دەپ اتاپ ءوتتى بريفينگ بارىسىندا «استانا ەكسپو-2017» ۇ ك» ا ق كوممەرتسيالاۋ دەپارتامەنتىنىڭ ديرەكتورى داۋلەت ەركىمبايەۆ.
ەستەرىڭىزگە سالا كەتەيىك، حالىقارالىق مامانداندىرىلعان كورمەسى استانا قالاسىندا 2017-جىلدىڭ 10- ماۋسىمىنان باستاپ 10- قىركۇيەككە دەيىن جالعاسادى. كورمەگە 5 ميلليونعا ادام جۋىق كەلەدى دەگەن بولجام بار.
ەركىن قالدان
«ايقىن»
