ەكسپو-2017 كورمەسىنىڭ بيلەت كاسسالارى شەت مەملەكەتتەردە اشىلماق
«قازىرگى ۋاقىتتا ءبىزدىڭ بيلەتتەر «مارۆين» - «مەلومان» ريتەيل-جەلىسىنىڭ 15 نۇكتەسىندە جانە «قازپوشتانىڭ» 1 مىڭعا تارتا بولىمشەلەرىندە ساتىلا باستادى.
وسى اپتادا بيلەتتەر رەسپۋبليكاداعى بارلىق 220 تەمىرجول ۆوكزالىنىڭ كاسسالارىندا دا ساتىلاتىن بولادى»، - دەدى «استانا ەكسپو-2017» ۇلتتىق كومپانياسى كوممەرتسيالاندىرۋ دەپارتامەنتىنىڭ ديرەكتورى داۋلەت ەركىمبايەۆ.
ەسكە سالا كەتەيىك، ەكسپو-2017 كورمەسىنىڭ بيلەت قۇنى 4 مىڭنان 8 مىڭ تەڭگە ارالىعىندا. بيلەتتەردى ونلاين كاسسالاردا نەمەسە قازاقستاننىڭ وبلىس ورتالىقتارىندا عانا ەمەس، رەسەيدىڭ 7 قالاسىنان دا ساتىپ الۋعا بولادى.
ولار: ماسكەۋ، سانكت-پەتەربور، سوچي، قازان، نوۆوسىبىر، نيجني نوۆگورود جانە ەكاتەرينبور. بارلىعى رەسەيدە بيلەت ساتاتىن 45 ورىن بار.
«رەسەيدە ساتۋ ورىندارىنىڭ سانىن ارتتىرا بەرەمىز. بيلەت كاسسالارىن وزگە مەملەكەتتەردەن دە اشۋ جوسپارلانعان. بۇل ماسەلە قازىر پىسىقتالۋدا. بيلەت ساتىلىمى ءبىزدىڭ ۆ ە ب-سايت ارقىلى دا جۇرگىزىلۋدە. ول جەردە باسقا مەملەكەتتەرگە شەكتەۋ قويىلماعان»، - دەپ اتاپ ءوتتى ول.
بۇگىنگى كۇنگە دەيىن ەكسپو-2017 كورمەسىنىڭ 670 مىڭ بيلەتى ساتىلعان. ونىڭ 13 پروتسەنتىن شەتەل ازاماتتارى العان.
اۆتور: جاسۇلان جولدىبايەۆ
