ەكسپو-2017: فرانسيانىڭ ۇلتتىق پاۆيلونى تاياۋ كۇندەرى دايىن بولادى
بۇل تۋرالى بۇگىن ەلورداداعى تاۋەلسىزدىك سارايىندا ءوتىپ جاتقان ەكسپو-2017 كورمەسىنە قاتىسۋشىلاردىڭ ءۇشىنشى جينالىسى اياسىندا ۇيىمداستىرىلعان باسپا ءسوز ءماسليحاتىندا فرانسيا ۇلتتىق سەكتسياسىنىڭ كوميسسارى پاسكال لورو ءمالىم ەتتى، دەپ حابارلايدى قازاقپارات.
«ءبىز بارلىق جۇمىستار دەر ۋاقىتىندا جاسالىپ جاتقاندىعىن نىق سەنىممەن ايتا الامىز. «ەكسپو-2017» كورمەسىنە قاتىسۋشىلار تۋرالى كەلىسىمگە قول قويعان ءبىرىنشى ەل بولدىق. سونىمەن قاتار ءبىز ءوز پاۆيلوننىڭ كىلتىن ەڭ ءبىرىنشى العان ەلمىز. بىرنەشە اي بويى پاۆيلوندى دايىنداۋ جۇمىستارىن جاساپ جاتىرمىز جانە تاياۋ ارالىقتا بارلىعى دا دايىن بولادى»، - دەدى ول.
فرانسيا پاۆيلونىنىڭ كوميسسارى ەكسپو كورمەسىن ۇيىمداستىرۋشىلارمەن تىعىز قارىم- قاتىناس ورناعاندىعىن، تۋىنداعان پروبلەمالاردى دەر ۋاقىتىندا اشىق تالقىلاپ، شەشىپ جاتقاندىقتارىن باسا ايتتى.
«ءبىز كەلۋشىلەردى شىن مانىندە تاڭىرقاتۋ ءۇشىن الۋان ءتۇرلى دۇنيە كورسەتۋگە تىرىساتىن بولامىز. جالپى، بىزدە بىرنەشە شاعىن پاۆيلون بولادى. وندا سىزدەر جاڭا تەحنولوگيالارعا قاتىستى قىزىقتى دۇنيەلەردى كورە الاسىزدار. فرانسيادا جاڭا تەحنولوگيالار سالاسىندا الەمدىك نارىقتا كوشباسشىعا اينالعان كومپانيالار وتە كوپ. قورشاعان ورتانى قورعاۋمەن بايلانىستى تەحنولوگيالار سالاسىندا دا جەتەكشى ورىنعا يە ءتۇرلى كومپانيالار بار. ءبىز ولاردىڭ بارلىعىن دا كورسەتكىمىز كەلەدى»، - دەدى لورو.
اۆتور: مارلان جيەمباي
