ۋنيۆەرسيادا-2017: رەسەي مەدالدار سانى بويىنشا الدىن الا جەڭىسكە جەتتى

استانا. قازاقپارات - رەسەيدىڭ حوككەيدەن ايەلدەر قۇراماسى فينالدا جەڭىسكە جەتكەننەن كەيىن، اتالمىش ەل قىسقى ۋنيۆەرسيادا ويىندارىنىڭ مەدالدار بويىنشا ەسەبىندە وزىنە ءبىرىنشى ورىندى قامتاماسىز ەتتى.

 دۇيسەنبى كۇنى رەسەيلىك حوككەيشى قىزدار كانادالىق قارسىلاستارىن جەڭىپ، «التىن» ەنشىلەدى. بۇل الماتىدا ءوتىپ جاتقان تۋرنيردە رەسەيدىڭ قورجىنىنا تۇسكەن جوعارى سىناماداعى 23- مەدال بولدى. رەسمي ەمەس مەدالدىق ەسەپتە رەسەيلىكتەردى وكشەلەپ كەلە جاتقان - قازاقستان قۇراماسى وسى ۋاقىتتا 10 «التىنعا» يە، دەپ جازادى ر- سپورت.

قىسقى ۋنيۆەرسيادا ويىندارىنىڭ سوڭىنا دەيىن مەدالداردىڭ تاعى 16 جيىنتىعى ويناتىلادى. قازاقستان قۇراماسى ەڭ كوپ دەگەندە تاعى 13 التىن مەدال ەنشىلەي الادى. ءبىراق مۇنىڭ وزىندە دە رەسەيلىك كوماندانى كۇمىس مەدالدار سانى بويىنشا قۋىپ جەتە المايدى. وسى ۋاقىتتا رەسەي قۇراماسىنىڭ ەنشىسىندە - 20، قازاقستاندا 6 «كۇمىس» بار.

 الماتىدا 28- دۇنيەجۇزىلىك قىسقى ۋنيۆەرسيادا ويىندارى 8 - اقپان كۇنى اياقتالادى.

 ايتا كەتەيىك، 6 - اقپان كۇنگى جارىس ناتيجەسى بويىنشا، تۋرنيرلىك كەستەدە ءبىرىنشى ورىندا - رەسەي (23 التىن، 20 كۇمىس، 13 قولا مەدال)، ەكىنشى ورىندا - قازاقستان (10 التىن، 6 كۇمىس، 11 قولا مەدال) جانە ءۇشىنشى ورىندا كورەيا (8 التىن، 4 كۇمىس، 5 قولا مەدال) تۇر.

اۆتور: گۇلميرا الياكپاروۆا