ۋنيۆەرسيادا-2017: قازاقستان قۇراماسى جالپى ەسەپتە بەسىنشى ورىندا

استانا. قازاقپارات - ۋنيۆەرسيادا ويىندارىندا ونەر كورسەتىپ جاتقان قازاقستان قۇراماسىنىڭ قورجىنى ءبىر كۇندە بىردەن ءۇش مەدالمەن (ءبىر كۇمىس، ەكى قولا) تولىعىپ، جالپى ەسەپتە بەسىنشى ورىننان كورىندى.

قىزدار اراسىنداعى 5 شاقىرىم كلاسسيكالىق ستيلدەگى شاڭعى جارىسىندا وتانداسىمىز اننا شيەۆچەنكو قازاقستان قورجىنىنا العاشقى جۇلدەنى سالدى. بۇل جارىستا وتانداسىمىز رەسەيلىك سپورتشىلارعا جول بەرىپ، رەسەي قۇراماسىنىڭ شاڭعىشىسى ليليا ۆاسيليەۆا ۋنيۆەرسيادا ويىندارىنىڭ العاشقى التىن مەدالىن ولجالادى.

قىزدار اراسىندا فريستايل- اكروباتيكادان جەرلەستەرىمىز جىبەك اراپبايەۆا مەن جانبوتا الدابەرگەنوۆا قازاقستان قورجىنىنا ءبىر كۇمىس جانە ءبىر قولا سالعانىن حابارلاعان بولاتىنبىز. وسى سايىس جولىندا باس جۇلدەنى قىتايلىق سپورتشى چجۋ ينين قانجىعاسىنا بايلادى.

جالپى ەسەپتە رەسەي قۇراماسى 4 التىن، 4كۇمىس، 1 قولامەن كوش باستاپ تۇر. ال وتانداستارىمىز 1 كۇمىس، 2 قولامەن بەسىنشى ورىنعا جايعاستى.

ايتا كەتەيىك، 30 - قاڭتارداعى جارىس كەستەسى بويىنشا جالپى 8 مەدال جيىنتىعى ساراپقا سالىندى. وسى ۋاقىتتا ەرلەر مەن ايەلدەر اراسىنداعى شايبالى حوككەيدەن توپتىق كەزەڭ ويىندارى جالعاسۋدا.