ۋنيۆەرسيادا-2017: قازاقستاندىق حوككەيشىلەر قىتاي كومانداسىن ويسىراتا جەڭدى

استانا. قازاقپارات - الماتىدا باستالعان ۋنيۆەرسيادا-2017 جارىسىندا قازاقستاننىڭ حوككەيدەن ستۋدەنتتەر قۇراماسى العاشقى ماتچتا ق ح ر حوككەيشىلەرىن 22:0 ەسەبىمەن ويسىراتا جەڭدى، دەپ حابارلايدى قازاقپارات.

«حالىق ارەنا» مۇز الاڭىندا قىتاي قۇراماسىنا قارسى وتكەن كەزدەسۋدە قازاقستاندىق سپورتشىلار ءوز قاقپالارىنا بىردە- ءبىر گول سالدىرمادى. ءوز كەزەگىندە قارسىلاستارعا ءبىرىنشى اينالىمدا 9 شايبا سالدى. الدىمەن ۆلاديمير گرەبەنشيكوۆ (1-مينۋت) ەسەپ اشتى. كەيىن ءاليحان اسەتوۆ (2-مينۋت)، انتون ساعادەيەۆ (5-مينۋت)، دميتري گرەنس (9-مينۋت)، ۆلاديسلاۆ نيكۋلين (10-مينۋت)، ارتەم بۋردەليەۆ (11-مينۋت پەن 13-مينۋت)، كيريلل ساۆيتسكي (12-مينۋت) جانە ماديار يبرايبەكوۆ (20-مينۋت) جالعاستىردى.

ەكىنشى اينالىمدا قازاقستاندىق حوككەيشىلەر نەبارى 58 سەكۋندتىڭ ىشىندە ەسەپتى ەسەلەدى. بۋردەليەۆ حەت-تريك اۆتورى اتاندى. جالپى ەكىنشى تايمدا تاعى بەس شايبا قاقپاعا ەندى. ميحايل راحمانوۆ (26-مينۋت)، انتون ساعادەيەۆ (30-مينۋت)، ارتەم بۋردەليەۆ (35-مينۋت) جانە ءاليحان اسەتوۆ (37-مينۋت پەن 39-مينۋت). سوڭعى جيىرما مينۋتتا قازاق قۇراماسى 7 گول سالدى. كەلەسى كەزدەسۋدى قازاقستان قۇراماسى 31 -قاڭتاردا شۆەتسيا حوككەيشىلەرىنە قارسى وتكىزبەك.

اۆتور: جاسۇلان جولدىبايەۆ