كەلەر 2017 -جىلى قازاقستاندا كولىك باعاسى قالاي بولماق

استانا. قازاقپارات - اعىمداعى جىلى اۆتوموبيل باعاسى وتكەن جىلعى دەڭگەيدە ساقتالاتىن بولادى.

بۇل جايىندا قازاقپارات قازاقستاندىق اۆتوبيزنەس قاۋىمداستىعىنا سىلتەمە جاساپ حابارلايدى. قاۋىمداستىق اقپاراتىنا قاراعاندا، الداعى ءۇش جىلدىڭ ىشىندە جاڭا اۆتوموبيلدەردى ساتۋ ۇلەسى ارتاتىن بولادى.

دەگەنمەن، مۇنداي جايت حالىقارالىق ۇيىمداردىڭ بولجامىنا سايكەس مۇناي باعاسى وسكەندە، ۆاليۋتا باعامىندا ايتارلىقتاي وزگەرىستەر بولماعاندا جانە باسقا دا ءبىرقاتار ماڭىزدى فاكتورلارعا بايلانىستى ورىن الماق.

«2017 -جىلدىڭ بازالىق ترەندتەرى: ساتىلىم قۇرىلىمىنداعى قازاقستاندىق ماشينالاردىڭ ءوسىمى بولادى؛ باعا 2016 -جىلعى دەڭگەيدە ساقتالادى؛ جول تالعامايتىن كولىكتەردىڭ تانىمالدىعى ارتادى؛ وتاندىق وندىرۋشىلەر شىعارعان ماشيناعا قاراعاندا يمپورت اۆتوموبيلدەردىڭ باعاسى نەگىزىنەن تەڭگە باعامىنا تاۋەلدى بولادى»، - دەلىنگەن حابارلامادا.

قاۋىمداستىق مالىمەتىنە قاراعاندا، 2016 -جىلى يمپورت كولىكتەردىڭ باعاسى 4 ميلليوننان 7,2 ميلليون تەڭگەگە دەيىن، ال وتاندىق كولىكتەر 4,3 تەن 5,3 ميلليون تەڭگەگە دەيىن قىمباتتادى. «جاڭا جانە قولدانىستاعى كولىكتەر نارىعى اعىمداعى كورسەتكىشتى ساقتايدى. ويتكەنى، كولىكتىڭ ارزانداۋى ازىرشە بايقالمايدى. قازاقستاندا جاسالعان جاڭا ماشينالاردىڭ قۇنىن ارزانداتۋ ءۇشىن وقشاۋلانۋ دەڭگەيىن ارتتىرۋ قاجەت. بۇعان قوسا، نارىقتىڭ باسىم بولىگىن يمپورت قۇراپ وتىر. سەبەبى، باعام تۇراقتادى جانە نارىقتا ايتارلىقتاي اۋىتقۋ بايقالمايدى. دەمەك، اعىمداعى جىلى اۆتوموبيلدەردىڭ باعاسى وتكەن جىلعى دەڭگەيدە كۇتىلۋدە»، - دەلىنگەن اقپاراتتا.

سونداي-اق قاۋىمداستىق اعىمداعى جىلى جول تالعامايتىن كولىكتەر ساتىلىمى ارتا تۇسەتىندىگىن اتاپ وتكەن. رەسمي ساتىلىم قۇرىلىمىندا Toyota LC Prado, Toyota LC200, Toyota RAV4, KIA Sportage, Nissan Qashqai, Hyundai Santa Fe, JAC S3 سىندى جول تالعامايتىن كولىكتەر ۇلەسى ارتقان. Toyota اۆتوموبيلى ساتىلىمىنىڭ ارتۋىنا 4 پايىزبەن جەڭىلدەتىلگەن نەسيە بەرۋ باعدارلاماسى ءوز سەپتىگىن تيگىزىپ وتىر.

ەسكە سالساق، جەلتوقسان ايىندا قازاقستاندا جەڭىل جانە جەڭىل كوممەرتسيالىق كولىكتەر نارىعىنا قاتىسۋشىلاردىڭ 2016 -جىلعى جۇمىسىنىڭ الدىن الا قورىتىندىسى شىعارىلدى. 2016 -جىلعى 11 ايدىڭ قورىتىندىسى بويىنشا، ساتىپ الىنعان 29357 اۆتوكولىك (%76) - يمپورتتىق ءونىم، ال قازاقستاندىق اۆتوزاۋىتتاردىڭ كولىكتەرىن 9422 (%24) ساتىپ الۋشى تاڭداعان. قازاقستاندىقتار وتكەن جىلى ەڭ كوپ ساتىپ العان كولىك برەندتەرى دە انىقتالدى.

بۇل رەيتينگتە Toyota كوش باستاپ تۇر: 2016 -جىلدىڭ 11 ايىندا رەسپۋبليكا اۋماعىندا جاپوندىق ماركانىڭ 7592 كولىگى ساتىلعان. Lada ۇلگىسىن 7300 ساتىپ الۋشى تاڭداعان. ءۇشىنشى ورىندا 3448 كولىك ساتقان - Renault ماركاسى.

ۇزدىك بەستىككە Hyundai جانە KIA ماركالارى ەنىپ وتىر.

اۆتور: مارلان جيەمباي