ق ر پرەزيدەنتى 2017-جىلدىڭ ەنشىسىندەگى ايتۋلى وقيعالار مەن اۋقىمدى ىستەردى اتادى
«بيىلعى مەرەيتويلىق جىل ءبىز ءۇشىن ءبىرقاتار ماڭىزدى شارالارعا تولى بولدى. ەلدىڭ ساياسي ومىرىندە ەلەۋلى ناۋقان - پارلامەنت سايلاۋىن وتكىزدىك. ۇلى ماقسات كوزدەگەن ۇلت جوسپارىنىڭ العاشقى جىلىن تابىستى اياقتادىق. الداعى 2017-جىلدىڭ ەنشىسىندە ايتۋلى وقيعالار مەن اۋقىمدى ىستەر مول بولماق. ەلىمىز بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەسى رەتىندە قىزمەتىن باستايتىن بولادى. بۇل كەز كەلگەن مەملەكەت قول جەتكىزە بەرمەيتىن اسقاق ابىروي، مارتەبەلى مىندەت»، - دەدى ەلباسى.
مەملەكەت باسشىسى كەلەر جىلى استانا مەيماندارى ەكسپو-2017 حالىقارالىق كورمەسىندە باس قوساتىندىعىن، سونىمەن قاتار الماتىدا دۇنيەجۇزىلىك قىسقى ۋنيۆەرسيادانىڭ الاۋى جاعىلاتىندىعىن اتاپ ءوتتى.
«ەڭسەلى ەلوردامىزدا يسلام ىنتىماقتاستىق ۇيىمىنىڭ سامميتى وتەدى. ەل قۋاتتى بولماي، باق تۇراقتى بولمايدى. حالىقتىڭ ءال-اۋقاتىن ارتتىرىپ، ەكونوميكامىزدى دامىتۋعا ارنالعان شارالار جالعاسىن تابادى. ءبىز ەندى تاۋەلسىز ەلىمىز ءۇشىن جاڭا 25 جىلدىقتىڭ جارقىن پاراعىن اشامىز. تابالدىرىقتان اتتاعالى تۇرعان جاڭا جىل تابىستى دا تاعىلىمدى جىل بولسىن!»- دەپ قۇتتىقتادى قازاقستاندىقتاردى ەلباسى نۇرسۇلتان نازاربايەۆ.
اۆتور: مارلان جيەمباي
