يمانعالي تاسماعامبەتوۆ ۋنيۆەرسيادا-2017 وبەكتىلەرىنىڭ ازىرلىگىن باعالادى
بۇگىن ۆيتسە-پرەمەر ۋنيۆەرسيادانىڭ سپورتتىق نىساندارى مەن ينفراقۇرىلىم نىساندارىن قاراپ شىقتى، فۋنكتسيونالدىق باعىتتاردىڭ جۇمىسىمەن ەگجەي- تەگجەيلى تانىستى.
كوشپەلى كەڭەس بارىسىندا يمانعالي تاسماعامبەتوۆ الماتىداعى مەدەۋ اۋدانىندا ورنالاسقان 3 مىڭ ورىندىق «حالىق ارەنا» سپورت كەشەنىنە، ۋنيۆەرسيادا وتەتىن اتلەتيكالىق قالاشىققا، «الماتى ارەنا» مۇز ايدىنى سارايىنا، «سۇڭقار» حشتك، «مەدەۋ» مۇز ايدىنىنا جانە «شىمبۇلاق» تاۋ شاڭعى كۋرورتىنا باردى. سونىمەن قاتار، «تاباعان» سپورت- ساۋىقتىرۋ كەشەنى مەن «الاتاۋ» شاڭعى بياتلون كەشەنىنىڭ جاڭعىرتىلۋى جانە دايىندىق بارىسىمەن تانىستى، دەپ حابارلايدى قر ۇكىمەتىنىڭ باسپا ءسوز قىزمەتىنەن.
الدا وتەتىن ۋنيۆەرسيادا وبەكتىلەرىنىڭ ازىرلىگى تۋرالى ايتا كەلە، ۆيتسە-پرەمەر سپورتتىق سايىستارعا وبەكتىلەردىڭ دايىندىق قارقىنىنا كوڭىلى تولاتىندىعىن ءبىلدىردى جانە ءبىرقاتار ناقتى تاپسىرمالار بەردى. سونداي- اق، يمانعالي تاسماعامبەتوۆ مۇنداي اۋقىمدى ءىس- شارانىڭ وتكىزىلۋى سايىستى ۇيىمداستىرۋ جانە بارلىق مۇددەلى قۇرىلىمدار مەن ۆەدومستۆولاردىڭ جۇمىسى تۇرعىسىندا ەگجەي- تەگجەيلى قاراۋدى قاجەت ەتەتىنىن اتادى.
يمانعالي تاسماعامبەتوۆ ءىس- شارانى وتكىزۋ جانە سايىس قاتىسۋشىلارىن قابىلداۋ اياسىندا قالا ينفراقۇرىلىمىنىڭ ازىرلىگىن قامتاماسىز ەتۋ قاجەتتىگىنە، سونداي- اق، ۋنيۆەرسيادا قوناقتارىنىڭ ءقاۋىپسىز جانە جايلى ورنالاسۋىن قامتاماسىز ەتۋ ءۇشىن بارلىق جاعداي جاساۋ قاجەتتىگىنە باسا نازار اۋداردى. بۇل رەتتە ول كولىك- لوگيستيكالىق جۇيەنىڭ ۇزدىكسىز جۇمىسىن قامتاماسىز ەتۋ وتە ماڭىزدى ەكەنىن كورسەتتى.
«ۋنيۆەرسيادانىڭ باستالۋىنا از عانا ۋاقىت قالدى. بارلىق كەزەڭدەگى جۇمىس جوعارى دەڭگەيدە ءجۇرىپ جاتىر. ينفراقۇرىلىم، قاتىسۋشىلاردى جانە قوناقتاردى قابىلداۋعا بايلانىستى ۇيىمداستىرۋ ماسەلەلەرىنە باسا نازار اۋدارۋ قاجەت. سونىمەن قاتار، قاۋىپسىزدىك، ەنەرگەتيكالىق جەتكىلىكتىلىك پەن كولىك جۇكتەمەسىن قوسا ەسەپتەگەندە، حالىقارالىق ءىس- شارانىڭ كەدەرگىسىز ءوتۋىن قامتاماسىز ەتۋگە قالالىق قىزمەتتەردىڭ تولىق ءازىر بولۋى وتە ماڭىزدى. ەڭ باستىسى، الماتىعا اعىلاتىن قوناقتاردىڭ كوپتىگىن جانە سپورتشىلاردىڭ، جاتتىقتىرۋشىلار شتابى مەن تىلشىلەردىڭ سايىس وتەتىن ورىنعا جانە قوناقجايلارعا بارىپ- كەلۋىن ەسەپكە العاندا، بۇل ازاماتتار ءۇشىن قولايسىزدىق تۋعىزباۋى ءتيىس»، - دەپ اتاپ ءوتتى يمانعالي تاسماعامبەتوۆ.
