استانا اۋەجايى جاڭا تەرمينالىنىڭ قۇرىلىسى 2017 -جىلدىڭ ناۋرىزىندا اياقتالادى - قاسىمبەك
«2015 -جىلدىڭ قاڭتارىندا «نۇرلى جول» باعدارلاماسىن ورىنداۋ اياسىندا «استانا قالاسى اۋەجايىنىڭ ۇشۋ- قونۋ جولاعىن قايتا جاڭعىرتۋ مەن جاڭا تەرمينالدىڭ قۇرىلىسى» جوبالارى باستالدى. جوبا بويىنشا جاڭا تەرمينالدىڭ، ۆيپ تەرمينالدىڭ، جاڭا تۇراق ورىندارى، ينجەنەرلىك ينفراقۇرىلىم قۇرىلىستارى مەن پەرروندى قايتا جاڭعىرتۋ جانە سول اۋماقتى اباتتاندىرۋ جۇزەگە اسىرىلادى»، - دەدى مينيستر.
ونىڭ ايتۋىنشا، جوبا قۇنى 60,2 ميلليارد تەڭگەنى قۇرايدى. بيىل ۇلتتىق قوردان 10 ميلليارد تەڭگە شاماسىندا قارجى ءبولىندى. ول قاراجات تولىق كولەمدە يگەرىلدى. بۇگىنگى تاڭدا عيماراتتىڭ تەمىر بەتوندى جانە بولات قاڭقاسىن تۇرعىزۋ جۇمىستارى اياقتالدى. قاسبەتىن، شاتىرىن، سۋ وتكىزۋ جەلىسىن، جىلۋ، ەلەكترمەن جابدىقتاۋ جانە كوممۋنيكاتسيالىق بايلانىس جەلىلەرىن ورناتۋ جۇمىستارى اتقارىلۋدا. ىشكى ارلەۋ جۇمىستارى ءجۇرىپ جاتىر جانە باگاجدى وڭدەۋ اۆتوماتتى قۇرىلعى جۇيەسىن مونتاجداۋ جۇمىستارى باستالدى.
«ورىندالعان جالپى جۇمىس كولەمى - 58 پايىز. قۇرىلىستىڭ تولىعىمەن اياقتالۋى 2017 -جىلدىڭ ناۋرىز ايىنا جوسپارلانىپ وتىر»، - دەدى ج. قاسىمبەك.
اۆتور: مارلان جيەمباي
