ەكسپو-2017 گە ەرىكتىلەردى قوسىمشا ىرىكتەۋ باستالدى
بۇعان دەيىن تەستىلەۋدەن وتكەن 3000 ەرىكتى قاتارىنا تاعى دا مىڭ جارىم ادام قوسىلاتىن بولادى. مۇنداي قاجەتتىلىك كورمە اياسىندا ءبىرقاتار اۋقىمدى حالىقارالىق دەڭگەيدەگى فورۋمدار مەن ءىس-شارالار وتكىزىلەتىندىكتەن تۋىنداپ وتىر، دەپ حابارلادى «استانا ەكسپو-2017» ۇ ك» ا ق باسپا ءسوز قىزمەتىنەن.
ايتالىق، بۇكىل الەمدىك تۋريستىك ۇيىممەن بىرلەسە وتىرىپ، تۋريستىك فورۋمنىڭ وتكىزىلۋى تۋرالى كەلىسىم جاسالدى. سونداي-اق، دۇنيەجۇزىنىڭ 165 مەملەكەتى قاتىساتىن World Boxing Council كونۆەنتسياسىنىڭ 55 جىلدىق مەرەيتويى مەن كاسىبي بوكس كەشىن ۇيىمداستىرۋ بويىنشا مەموراندۋمعا قول قويىلدى.
«تاعى ءبىر سەبەپ قاتىسۋشىلار كولەمىن ۇلعايتۋ. بۇگىنگى تاڭدا حالىقارالىق مامانداندىرىلعان كورمەگە قاتىساتىندىعىن 103 مەملەكەت پەن 17 حالىقارالىق ۇيىم راستادى. تاعى دا بىرنەشە مەملەكەتتەرمەن جۇمىس اتقارىلىپ جاتىر. سونىمەن قاتار، كەيبىر مامانداردىڭ پىكىرىنشە، قاتىسۋشىلار سانى ۇلعايماق»، - دەلىنگەن حابارلامادا.
العاشقى تەستىلەۋدەن ج و و ستۋدەنتتەرى وتەدى. وڭىرلەر مەن الماتى قالاسىنان قاتارعا قوسىلعىسى كەلەتىن ەرىكتىلەر ءۇشىن اڭگىمەلەسۋ كۇزدىڭ اياعىنا تامان ۇيىمداستىرىلادى.
ەكسپو-2017 ەرىكتىسى قاتارىنا 18 گە تولعان، الايدا 80 نەن اسپاعان كەز-كەلگەن ادام قوسىلا الادى. تالاپتاردىڭ تاعى ءبىرى قازاق، ورىس، اعىلشىن تىلدەرىن ءبىلۋ. مادەني ءىس-شارالاردا قاتىسۋى قۇپتالادى. جالپى، كەلەسى جىلعى الەمدىك دەڭگەيدەگى شاراعا 4500 دەن اسا ەرىكتى تارتۋ جوسپارلانعان.
