ۋنيۆەرسيادا-2017 ويىندارىنىڭ العاشقى جەرەبە تارتۋ ءراسىمى ءوتتى

استانا. قازاقپارات - الماتىدا ۋنيۆەرسيادا-2017 ويىندارىنا قاتىساتىن شايبالى حوككەي بويىنشا ەرلەر مەن ايەلدەر كوماندالارى اراسىندا جەرەبە تاستاۋ ناتيجەلەرى بەلگىلى بولدى، دەپ حابارلايدى BAQ.kz ءتىلشىسى.

شايبالى حوككەي جارىستارىنا بارلىعى 12 ەر جانە 7 ايەل كومانداسى قاتىسپاق. ەرلەر كومانداسى 4 كوماندادان تۇراتىن 3 توپقا، ال ايەلدەر ا توبىندا 4 كوماندا، В توبىندا 3 كوماندا بولىپ 2 توپقا ءبولىندى.

قازاقستان ويىنداردى وتكىزىپ وتىرعان قوجايىن ەل رەتىندە А توبىندا ءنومىر ءبىرىنشى كوماندا بولىپ جارىسقا تۇسەتىن بولادى.

ەرلەر قۇراماسى اراسىندا جەرەبە تاستاۋ ناتيجەلەرى كەلەسىدەي:

А توبىندا

قازاقستان، چەحيا، شۆەتسيا، قىتاي ونەر كورسەتەدى.

В توبىندا

كانادا، سلوۆاكيا، ا ق ش، ۇلى بريتانيا،

С توبىندا

رەسەي، جاپونيا، كورەيا، لاتۆيا وينايتىن بولادى.

ايەلدەر كومانداسى اراسىندا

А توبىندا

قازاقستان، كانادا، قىتاي، ۇلى بريتانيا.

В توبىندا

رەسەي، جاپونيا، ا ق ش كوماندالارى باسەكەلەسپەك.

كانادادان كەلگەن دەلەگاتسيا وكىلى اري دجوشۋا گروسسمان جەرەبە تاستاۋ ناتيجەلەرىنە قاتىستى ءوز ويىن جەتكىزدى.

«ايەلدەر اراسىنداعى حوككەي جايلى ايتار بولساق، ءبىز ويىنداردى ۇيىمداستىرىپ وتىرعان ەلدىڭ قۇراماسىمەن بىرگە ءبىر توپتا ونەر كورسەتەتىندىگىمىزگە قاتتى تولقىپ تۇرمىز. قازاقستان كومانداسىمەن تاماشا الاڭدا ويىن كورسەتۋ ءۇشىن سايىستاردىڭ باستالعانىن تاعاتسىزدانا كۇتۋدەمىز. سونداي-اق، توپ ىشىندە ق ح ر قۇراماسى بار، وتە مىقتى باسەكەلەس، ولار تاياۋداعى جارىستاردا جۇلدەگەر اتاندى. ءتورتىنشى كوماندا - ۇلى بريتانيا قۇراماسى، ولار سوڭعى جىلدارى وتە قارقىندى دامىپ ءوسىپ كەلەدى. قارسىلاستارىمىزبەن كەزدەسۋدى اسىعا كۇتۋدەمىز جانە دە بىزدەردى وتە قىزىقتى ويىن كۇتىپ تۇر دەپ ويلايمىن» - دەدى كانادالىق وكىل.

گروسسمان مىرزا ەرلەر اراسىنداعى حوككەي ويىندارى دا وتە اسەرلى وتەدى دەپ سەندىردى.

«ءبىزدىڭ قۇراما سلوۆاكيا مەن ۇلى بريتانيانىڭ اسا مىقتى جانە قىزىقتى كوماندالارىمەن جارىسقا تۇسەدى. كانادا مەن ا ق ش تۋرالى ايتار بولساق، باسەكەلەس بولۋ ءبىزدىڭ تاريحىمىزدا جازىلعان. حوككەي بويىنشا سايىستار ءبىزدىڭ كوماندالار اراسىنداعى جارىسپەن باستالادى دەپ ويلايمىن جانە بۇنى تاعاتسىزدانا كۇتىپ وتىرمىز. سونداي-اق، سلوۆاكيا قۇراماسىمەن ويناۋ ءارقاشاندا قيىن. جالپى العاندا، ارامىزدا رەسەي، قازاقستان، شۆەتسيا، سلوۆاكيا سەكىلدى اسا مىقتى كوماندالار كوپ. ويىنداردى تاماشالاۋ جانە كىمنىڭ جەڭىسكە جەتەتىندىگىن كورۋ اسا قىزىقتى بولماق. ويىنداردىڭ باستالعانىن اسىعا كۇتەمىز»، - دەدى ول.

الماتىداعى كەزدەسۋ ۋنيۆەرسياداعا قاتىسۋشى ەلدەردەن كەلگەن دەلەگاتتاردى ۇلكەن اسەردە قالدىردى.

«قارىم-قاتىناس قۇرىپ، تاجىريبە الماسۋ جانە دە ناعىز سپورت مەرەكەسىن تويلاۋ ءۇشىن سىزدەردىڭ سۇلۋ قالالارىڭىز بۇكىل الەم ستۋدەنتتەرىنىڭ باسىن قوسپاق»، - دەپ اتاپ ءوتتى قىرعىزستان رەسپۋبليكاسى ۇلتتىق ستۋدەنتتەر سپورتى فەدەراتسياسى ءتوراعاسىنىڭ ورىنباسارى الشيوراز بابايەۆ.

حالىقارالىق ستۋدەنتتەر سپورتى فەدەراتسياسىنىڭ (FISU) پرەزيدەنتى ولەگ ماتىتسين باستاعان دەلەگاتسيا، سونداي-اق، ۇلتتىق ستۋدەنتتەر سپورتى فەدەراتسيالارىنىڭ باسشىلارى 2017-جىلعى 28-بۇكىل الەمدىك قىسقى ۋنيۆەرسيادا جارىستارىنىڭ وتكىزىلەتىن سپورت نىساندارىنا 13-17- قىركۇيەك كۇندەرى ارالىعىندا تەكسەرۋ جۇرگىزگەن بولاتىن. اتلەتتەر اۋىلىنا، «سۇڭقار» حالىقارالىق شاڭعى ترامپلينى كەشەنىنە، بالۋان شولاق اتىنداعى سپورت جانە مادەنيەت سارايىنا، «الماتى ارەنا» مۇز سارايىنا، «مەدەۋ» بيىك تاۋلى مۇز ايدىنىنا جانە «شىمبۇلاق» تاۋ-شاڭعى كەشەنىنە، «الاتاۋ» شاڭعى-بياتلون كەشەنىنە، «تاباعان» سپورت ويىن-ساۋىق كەشەنىنە بارعان دەلەگاتسيا وكىلدەرى ۋنيۆەرسيادا نىساندارىنا وتە جوعارى باعا بەردى. ۋنيۆەرسياداعا دايىندىق بارىسى FISU تالاپتارىنا سايكەس جوعارى قارقىنمەن جۇرگىزىلىپ جاتقاندىعىن دا ەرەكشە اتاپ ءوتتى.