17:19, 18 - قىركۇيەك 2016 | GMT +6
گولوۆكين مەن الۆارەس جەكپە-جەگى 2017-جىلدىڭ قىركۇيەگىندە ءوتۋى مۇمكىن
استانا. قازاقپارات - مەكسيكالىق بوكسشى ساۋل الۆارەس قازاقستاندىق گەننادي گولوۆكينگە قارسى جەكپە-جەكتى 2017-جىلدىڭ قىركۇيەگىندە وتكىزۋى مۇمكىن.
بۇل تۋرالى ESPN تەلەارناسى الۆارەستىڭ پروموۋتەرى وسكار دە لا حوياعا سىلتەمە جاساپ حابارلادى.
وسىعان دەيىن الۆارەس 12 كەزەڭدىك جەكپە-جەكتە بريتانيالىق لايام سميتتى 9- كەزەڭدە نوكاۋتپەن جەڭىپ، بۇكىل الەمدىك بوكس ۇيىمى (WBO) نۇسقاسى بويىنشا الەم چەمپيونى بەلدىگىن تارتىپ الدى، دەپ حابارلادى ت ا س س.
الۆارەس 34 جاستاعى قازاقستاندىقپەن كەزدەسۋ وتكىزۋ تۋرالى كەلىسسوزدەر بۇرىن جۇرگىزىلگەنىن ايتتى. «ءبىر اي بۇرىن گولوۆكينگە ونىڭ بۇرىنعى تابىسىنان ەكى نەمەسە ءۇش ەسە كوپ ۇسىندىق»، - دەدى مەكسيكالىق.
گولوۆكين بۇكىل الەمدىك بوكس قاۋىمداستىعى (WBA) ، حالىقارالىق بوكس فەدەراتسياسى (IBF) مەن بۇكىل الەمدىك بوكس كەڭەسىنىڭ (WBC) نۇسقالارى بويىنشا الەم چەمپيونى. 11- قىركۇيەكتە ول بريتانيالىق كەلل برۋكقا قارسى كەزدەسۋدە تيتۋلدارىن قورعاپ قالدى.
