ۋنيۆەرسيادا-2017 ويىندارىن وتكىزۋ قىسقى سپورت تۇرلەرى كادرلارىنىڭ تاپشىلىعىن جويۋعا سەپتەسەدى - ا. نيەۆزوروۆ
بۇل تۋرالى قازاقپارات تىلشىسىنە ق ر شاڭعى جارىستارى فەدەراتسياسىنىڭ باس حاتشىسى اندرەي نيەۆزوروۆ ءمالىم ەتتى.
«مۇنداي دەڭگەيدەگى كەز كەلگەن سپورتتىق شارا سپورت ءۇشىن جانە قازاقستاننىڭ يميدجى ءۇشىن تىڭ سەرپىن بەرەدى. ءبىزدىڭ ەلىمىز قىس مەزگىلىنەن قۇر الاقان ەمەس، قار قالىڭ تۇسەدى. ياعني، سپورتشىلاردى قىسقى سپورت تۇرلەرىنە جوعارى دەڭگەيدە دايىنداۋعا، زور ناتيجەلەر كورسەتىپ، جەڭىسكە جەتۋگە مۇمكىنشىلىك مول»، - دەدى ول.
سوندىقتان دا ا. نيەۆزوروۆتىڭ پىكىرىنشە، دۇنيەجۇزىلىك ۋنيۆەرسيادا سىندى مۇنداي اۋقىمداعى ءىس-شارا قازاقستاندىق سپورتشىلاردى ىنتالاندىرۋمەن قاتار ادامداردىڭ قىسقى سپورت تۇرلەرىن مەيلىنشە تاني تۇسۋگە سەپتىگىن تيگىزەدى. بۇعان قوسا، قالادا سپورتشىلاردى دايىنداۋعا قاجەتتى ينفراقۇرىلىمنىڭ كەڭەيە تۇسۋىنە دە سەپتىگىن تيگىزەدى.
«دەگەنمەن، ءبىز تەك سپورتشىلار عانا ەمەس، جاتتىقتىرۋشى قۇراممەن دە پروبلەما بار. ياعني، قايتا قۇرۋدىڭ قيىن جىلدارىنان بەرى پوستكەڭەستىك ۋاقىتتىڭ جاتتىقتىرۋشىلار بازاسىمەن كەلە جاتىرمىز. ال جاس بۋىن سپورتقا، اسىرەسە، تاۋ شاڭعىسى، شاڭعى جارىسى، سنوۋبورد پەن فريستايلعا بارا بەرمەيدى. دەمەك، كادرلار تاپشىلىعى بايقالۋدا. ال مۇنداي فورۋمدار سپورتشىلارمەن قاتار جاتتىقتىرۋشىلاردىڭ وزدەرىنىڭ دە وسۋىنە ىقپال ەتەدى. ولار كورەدى، ۇيرەنەدى، تاجىريبە الماسادى. بۇل ولاردىڭ ودان ارى دامۋىنا ىنتالاندىرادى»، - دەدى ا. نيەۆزوروۆ.
الماتىدا وتەتىن ۋنيۆەرسيادا-2017 ويىندارى قازاقستان تاريحىنداعى ءىرى سپورتتىق شارا بولىپ سانالادى. الماتى حالىقارالىق قىسقى ستۋدەنتتىك ويىندار وتەتىن ت د م ەلدەرى اراسىنداعى ەڭ ءبىرىنشى قالا بولماق.
اۆتور: مارلان جيەمباي
