ەكسپو-2017 كورمەسىنىڭ اشىلۋ جانە جابىلۋ سالتاناتىن قازاقستان ءوز كۇشىمەن وتكىزەدى

استانا. قازاقپارات - ەلىمىزدىڭ بارلىق وڭىرلەرىنىڭ ونەر ادامدارى ەكسپو كورمەسىنە قاتىسۋى قاجەت.

بۇل تۋرالى بۇگىن استانا قالاسىنىڭ الەۋمەتتىك-ەكونوميكالىق دامۋى مەن ەكسپو كورمەسى ماسەلەلەرىنە ارنالعان كەڭەستە ق ر پرەزيدەنتى نۇرسۇلتان نازاربايەۆ ءمالىم ەتتى.

«ەكسپو كەزىندەگى مادەني شارالار مادەنيەت جانە سپورت مينيسترلىگىمەن قاراستىرىلدى. ءبىز سونىمەن قاتار ميلانداعى ەكسپو-نىڭ اشىلۋ جانە جابىلۋ سالتاناتىن، تاياۋداعى انتاليا كورمەسىنىڭ اشىلۋىن ءجىتى زەردەلەدىك. بۇل شارالار بارىنشا ىقشام تۇردە، رەسمي بولىگىنە باسا ءمان بەرىلە وتىرىپ داڭعازاسىز وتكىزىلگەنىنە كوز جەتكىزدىك. بۇل بىزگە ونشا كەلمەيتىن شىعار. ءبىز ءوزىمىزدىڭ مەنتاليتەتىمىزدى ەسكەرە وتىرىپ جاقسىلاپ دايىنداپ جاتىرمىز»، - دەدى كەڭەس بارىسىندا بايانداما جاساعان «استانا ەكسپو-2017» ۇلتتىق كومپانياسىنىڭ باسشىسى احمەتجان ەسىموۆ.

«اشىلۋىن جانە جابىلۋىن ءوزىمىزدىڭ كۇشىمىزبەن وتكىزەمىز بە؟» دەپ سۇرادى ەلباسى ءوز كەزەگىندە مادەنيەت جانە سپورت ءمينيسترى ارىستانبەك مۇحامەدي ۇلىنان.

«قۇرمەتتى نۇرسۇلتان ءابىش ۇلى، احمەتجان سماعۇل ۇلى ايتقانداي، ءبىز قازىر اكىمدىكپەن بىرلەسىپ، سەناريىن قاراستىرىپ جاتىرمىز. وتە دۇرىس ايتادى، بارلىعىن ءوز كۇشىمىزبەن وتكىزۋىمىز كەرەك»، - دەدى مينيستر.

وسى ورايدا ق ر پرەزيدەنتى كورمە وتەتىن ءۇش اي بويى، كۇندەلىكتى تۇردە ەكسپو كورمەسىن تاماشالاۋعا كەلەتىن تۋريستەرگە مادەنيەتىمىز بەن ونەرىمىزدى، سالت-ءداستۇرىمىزدى كورسەتۋىمىز قاجەتتىگىن باسا ايتتى.

«قازاقستاننىڭ بارلىق وڭىرىندەگى ونەر ادامدارىنا سونداي الاڭدار اشىلادى. قۋانىشتى جاعداي عوي. بارلىق وبلىستاردان، وڭىرلەردەن ونەر ادامدارى قاتىساتىن بولسىن»، - دەپ تاپسىردى ن. نازاربايەۆ.

اۆتور: مارلان جيەمباي