كەلەسى ەۋرازيالىق مەديا فورۋم 2017-جىلدىڭ ماۋسىمىندا وتەدى

استانا. قازاقپارات - كەلەسى، ⅩⅣ ەۋرازيا مەديا فورۋمى 2017-جىلدىڭ 22-23- ماۋسىمىندا استانادا وتەدى.

بۇل تۋرالى بۇگىن ХІІІ  ەۋرازيا مەديا فورۋمى بارىسىندا ۇيىمداستىرۋ كوميتەتىنىڭ ءتوراعاسى، ق ر پرەمەر-ءمينيسترىنىڭ ورىنباسارى داريعا نازاربايەۆا ءمالىم ەتتى.

«وزدەرىڭىز بىلەتىندەي، قازاقستان كەلەسى جىلى حالىقارالىق ەكسپو كورمەسىن وتكىزەدى. ⅩⅢفورۋمعا قاتىسقان شەتەلدىك قوناقتاردىڭ ءبارى بۇگىن استانا قالاسىن ارالاعاندا، ەكسپو الاڭىنا دا بارادى. ال، مەن كەلەسى ⅩⅣ ەۋرازيا مەديا فورۋمى 22-23- ماۋسىم كۇندەرى، ەكسپو كورمەسىنىڭ اۋماعىندا وتەتىنىن قۋانا حابارلايمىن»، - دەدى د. نازاربايەۆا ⅩⅢفورۋمدى قورىتىندىلاي وتىرىپ.

ⅩⅢ ەۋرازيا مەديا فورۋمىنا قاتىسۋ ءۇشىن بيىل قازاقستاننىڭ ەلورداسىنا 50 ەلدەن 400 دەلەگات، 30 ارنايى سپيكەر كەلدى. ەستەرىڭىزگە سالا كەتەيىك، ەۋرازيالىق مەديا فورۋم 2002-جىلى داريعا نازاربايەۆانىڭ باستاماسى بويىنشا باتىس پەن شىعىسقا قاتىستى ماسەلەلەردى تالقىلايتىن كوممەرتسيالىق ەمەس جانە ساياساتتان تىس ۇيىم رەتىندە قۇرىلعان ەدى.

اۆتور: كەنجەكەي توقتامۇرات قىزى