19:19, 25 - ناۋرىز 2016 | GMT +6
ەكسپو-2017 كورمەسى كەزىندە تەمىرجول ۆوكزالدارىنىڭ قىزمەتكەرلەرى اعىلشىن تىلىندە سويلەيتىن بولادى
استانا. قازاقپارات - استانا، الماتى-1، الماتى-2، قاراعاندى، كوكشەتاۋ، بۋراباي شيپاجايى ۆوكزالدارىنىڭ قىزمەتكەرلەرى «ەكسپو-2017» دۇنيەجۇزىلىك كورمەسىنە دايىندىق اياسىندا اعىلشىن ءتىلىن وقيتىن بولادى، دەپ حابارلايدى ق ت ج باسپا ءسوز قىزمەتىنەن.
ۆوكزال كەزەكشىلەرى، انىقتاما قىزمەتىنىڭ جۇمىسكەرلەرى، ديكتورلار اعىلشىن ءتىلىن اعىمداعى جىلدىڭ ەكىنشى جارتىسىندا وقي باستايدى. وقىتۋ بارىسىندا تەمىرجول سالاسىنىڭ تىلدىك ەرەكشەلىگى ەسەپكە الىنعان ادىستەمەلەر قولدانىلادى. بۇل قازاقستاندىق ۆوكزالداردىڭ قىزمەتكەرلەرىنە شەتەلدىك جولاۋشىلارعا قىزمەت كورسەتۋ ساپاسىن ءوسىرىپ، ولارعا بيلەتتەردى ساتىپ الۋ، باعدارلاردى انىقتاۋ كەزىندە كومەك كورسەتۋگە مۇمكىندىك بەرەدى.
«ەكسپو-2017» كورمەسىنە دايىندىق اياسىندا تەمىرجول ۆوكزالدارىندا ارنايى باننەرلەر، تاقىرىپتىق بەينەروليكتەر ورنالاستىرىلادى.
ۆوكزالداردا «ەكسپو-2017» حالىقارالىق كورمەسىنە بيلەتتەر ساتاتىن كاسسالار اشۋ جوسپارلانىپ وتىر.
