ءا. جاقسىبەكوۆ: ەكسپو-2017 كورمەسىنە كەلۋشىلەردى تارتۋ - باستى مىندەت

استانا. قازاقپارات - بۇگىن استانا قالاسىنىڭ اكىمى ادىلبەك جاقسىبەكوۆ كەزەكتى اپپارات وتىرىسى بارىسىندا ەلوردا كۇنىنە وراي وتكىزىلگەن مەرەكەلىك ءىس-شارالاردىڭ قورىتىندىسىن شىعاردى.

بۇل تۋرالى قالا باسشىسىنىڭ باسپا ءسوز قىزمەتى حابارلادى.

اكىم استانا كۇنىن مەرەكەلەۋگە اتسالىسقان بارلىق قۇرىلىمداردىڭ جوعارى دەڭگەيلى جانە بىرلەسكەن جۇمىستارىنا وڭ باعاسىن بەردى. جالپى، استانا قالاسىندا 80 مەرەكەلىك ءىس-شارا ءوتىپ، وعان 700 مىڭنان استام قوناق قاتىستى. مەرەكەلىك شارالار جونىندە بايانداۋ ءۇشىن 700 استام وتاندىق جانە شەتەلدىك ب ا ق وكىلى تىركەلدى. بيىلعى شارالاردىڭ ءبىر ەرەكشەلىگى - بارلىق اۋداندار مەن تۇرعىن الاپتارىن قامتۋ بولدى،

- ەلوردانىڭ مەرەكەلىك بەزەندىرىلۋىنە ەرەكشە توقتالىپ وتپەكپىن. الەۋمەتتىك جەلىلەردە تۇرعىنداردىڭ قالانىڭ كەلبەتىنە وڭ باعاسىن بەرگەنىن بايقاۋعا بولادى. ءتۇرلى مەرەكەلىك مۇسىندەردىڭ جانىندا تۇسكەن سۋرەتتەر جاريالانىپ جاتىر. «ەل جۇرەگى - استانا!»، «I Love Astana»  سەكىلدى برەند مۇسىندەر ۇلكەن رەزونانسقا يە بولدى، - دەدى اكىم.

سونداي-اق، جينالىس بارىسىندا ەلوردانىڭ دامۋى ءۇشىن ناتيجەلى جۇمىس پەن تاباندى ەڭبەك ەتىپ جۇرگەن ەڭ ۇزدىك قالالىق قۇرىلىمدار ماراپاتتالدى.

اۋداندار اراسىندا «ەسىل» اۋدانى توپ جاردى. «ۇزدىك قالالىق قۇرىلىم» اتالىمىندا ءبىلىم باسقارماسى، «ۇزدىك اۋماقتىق قۇرىلىم» رەتىندە ىشكى ىستەر دەپارتامەنتى، «ۇزدىك قالالىق ونەركاسىپ» رەتىندە «ەلوردا دامۋ» ج ش س تانىلدى.

وزگە دە وزەكتى ماسەلەلەر تۋرالى ايتا كەلە، قالا باسشىسى ەكسپو-2017 حالىقارالىق كورمەسىنە تۋريستەر مەن قوناقتاردى تارتۋ جۇمىستارىنا باسا نازار اۋداردى، سونىمەن قاتار، وسى باعىتتا «ەكسپو-2017» ۇلتتىق كومپانياسى مەن قالالىق قۇرىلىمدار اراسىندا تىعىز قارىم-قاتىناس ورناتىلۋى كەرەك ەكەندىگىن ايتتى. اكىم قىتاي، رەسەي سەكىلدى مەملەكەتتەردىڭ شەكارالاس قالالارىمەن ءوزارا قارىم-قاتىناستى جولعا قويۋدى دا ءسوز ەتتى.

- قازىر ءبىز ءۇشىن كەلۋشىلەردى تارتۋ - باستى مىندەتىمىز. «قالالار ديپلوماتياسى» ارنالارىن ءتيىمدى پايدالانۋ قاجەت، اسىرەسە، ت م د ءىرى قالالارى مەن ەلوردالارى حالىقارالىق اسسامبلەياسى جەلىسى بويىنشا، - دەدى ءا. جاقسىبەكوۆ.